Túrkistan oblysynyń ákimi Ómirzaq Shókeevtiń tapsyrmasymen Qazyǵurt jáne Saryaǵash aýdanyndaǵy jaýyn-shashyn saldaryn joiý boiynsha arnaiy komissiia quryldy, dep habarlaidy QazAqparat.
Túrkistanda ótken májiliste oblys ákimi Ómirzaq Shókeev eldi mekenderdi sýdan tazartyp, turǵyndarǵa zań aiasynda kómek kórsetýdi tapsyrdy.
«Qazyǵurt pen Saryaǵashtaǵy jaǵdai boiynsha arnaiy komissiia qurylyp, shyǵyndar obektivti eseptelýi tiis. Mal shyǵyny boiynsha Aýyl sharýashylyǵy basqarmasy tiisti sheshim qabyldap, zań sheńberinde óz mindetterin oryndasyn. Bul – jergilikti, aýdandyq deńgeide sheshiletin másele. Bizdiń jiti nazarymyzda tur», – dedi Ómirzaq Shókeev.
Túrkistan oblystyq tótenshe jaǵdailar departamentiniń bastyǵy Nurǵali Júnisov Qazyǵurttaǵy 4 eldi meken men Saryaǵashtaǵy bir eldi mekende jaýyn-shashyn saldaryn joiý baǵytynda túnimen jumys júrgenin, áli de jalǵasyp jatqanyn málimdedi.
Anyqtalǵandai, 53 úidiń aýlasyna, sonymen birge 18 úi, 1 meiramhana men 16 ǵimaratqa sý kirgen.
Tótenshe jaǵdai saldaryn joiýǵa oblystyq tótenshe jaǵdailar departamentiniń 56 jáne jergilikti ákimdiktiń 19 qyzmetkeri jumyldyrylǵan. 15 tehnika men 13 motopompa jumys istep tur.
«Adam shyǵyny joq, jaǵdai tolyq baqylaýǵa alynǵan. Mal shyǵyny eseptelýde. Jalpy, qaýip-qater seiildi. Evakýatsiialanǵan 50 turǵyn óz úilerine qaitaryldy. Jumys jalǵasyp jatyr», – dedi departament bastyǵy.
