Qazyǵurt aýdany taýly óńir bolǵandyqtan tańqýrai ósirýge óte qolaily. Sondyqtan aldaǵy jyldary munda tańqýrai egistik kólemin ulǵaitý qajet. Eń bastysy – bilikti baǵbandardyń tájiribesin jurtpen bólisip, tańqýrai ósiremin deýshilerdiń basyn biriktirgen jón. Bul týraly Qazyǵurt aýdanyna jasaǵan jumys sapary barysynda «Nur-aidar» sharýa qojalyǵynyń jumysymen tanysqan Ońtústik Qazaqstan oblysynyń ákimi Janseiit Túimebaev málim etti.
Qazyǵurt aýdany Jińishke aýyl okrýgindegi «Nur-Aidar» sharýa qojalyǵy 3 jyldan beri tańqýrai ósirip keledi. Alǵashynda úi irgelik 7 sottyq jerge tańqýrai egip daǵdylanǵan Erkin Sheráliev búginde naǵyz bilgir mamanǵa ainalǵan. Qazir ol 3 gektar jerdi 49 jylǵa jalǵa alyp, kúnine 200 keli tańqýrai jinaýda.
«Tańqýraidyń kelisin 700 teńgeden satyp jatyrmyz. Bul jemis daqylyń ár túbi 2-3 keliden ónim beredi. Al maýsymynda 1 gektardan 12 tonnaǵa deiin jemis jinaýǵa bolady. Jiyn –terim jumystaryna 20-ǵa jýyq aýyl turǵyndary tartylyp, ár qaisysyna kúnine bir keli terse 150 teńgeden aqy tólep jatyrmyz. Jumysshylardyń tamaǵy tegin. Mundaǵy jumysshylar kúnine orta eseppen 2000-3000 teńgeniń kóleminde aqsha tabady»,- deidi qojalyq tóraǵasy Erkin Sheráliev.
Negizinen tańqýrai butaly kópjyldyq ósimdik sanalady. Jabaiy túrde azǵana bolsa da kóleńkeli jerde jaqsy ósedi. Osyny eskergen qojalyq aýyl irgesindegi qyratty aýmaqta arnaiy tańdapty. Qojalyq aldaǵy ýaqytta jemis kólemin 1,5 gektarǵa ulǵaitamyn dep otyr. Sharýanyń jumys josparyna razy bolǵan oblys ákimi aýdan basshylyǵyna Qazyǵurt aýdanyndaǵy taýly aýyl okrýkterinde tańqýrai plantatsiialaryn ulǵaitýdy tapsyrdy.
«Biz osyndai isker ári baǵban azamattarymyzdy qoldaýymyz qajet. «Nur-Aidar» sharýa qojalyǵynyń tájiribesin paidalanyp, aýdanda tańqýrai ósirý isin jandandyrý qajet. Tipti osy qojalyq ózge sharýalardyń basyn qosyp, kooperativ qurýyna kómektesýimiz kerek»,- dedi Janseiit Qanseiituly.
Munan soń oblys ákimi S. Raqymov aýyl okrýgindegi «Qazyǵurt» saýyqtyrý ortalyǵy men balalar lageriniń jumysymen tanysty. «Nurlan» sharýa qojalyǵynyń ieligine qaraityn demalys aimaǵy 2011-2013 jyldary boi kótergen. Jalpy alańy 2 gektar jerde 44 oryndyq 11 kotedj, 2 qabatty demalys úileri, sport alańy, ashana, basseini bar. Jalpy demalys aimaǵyna 300 mln teńge investitsiia salynǵan. Demalys aimaǵynda budan bólek, atpen serýendeý jáne bie ustalyp, saýmal ortalyǵy jumys isteidi.
