Qazyǵurt aýdanynda ónerkásip ónim kóleminiń jyl saiyn artýyna óńirde ashylǵan indýstriialdyq aimaqtyń úlesi mol. Búgingi tańda «Qazyǵurt» indýstriialdyq aimaǵynyń jalpy aýmaǵy - 13 gektar. Onda 1,9 mlrd. teńgeni quraityn 7 jobaǵa jer telimi berilgen.
2016-2017 jyldary 3 joba iske asyrylsa, 2018 jyly 589 mln. teńgelik tabiǵi shyryn sýsyn óndiretin «Kórik ShQ» JShS-i jumysyn bastady. Al 3 jobany 2019 jyly iske qosý josparlanǵan. Bul týraly Túrkistan oblysynyń Óńirlik kommýnikatsiialar qyzmetinde ótken brifingte Qazyǵurt aýdanynyń ákimi Tólegen Telǵaraev málimdedi.
Aýdan basshysynyń aitýynsha, aldaǵy jyly indýstriialdy aimaqta iske qosylatyn jobalardyń arasynda jalpy quny 602,7 mln. teńgeni quraityn qurǵaq sút jáne sary mai óndiretin «Asyl bastaý KZ» JShS-i, quny 125 mln. teńgelik «Aq-niet 5» ÓK-niń «Temir beton ónimderi» jobasy jáne quny 112,7 mln. teńge quraityn «KN eksport 777» JShS-ń «Jihaz shyǵarý» jobasy bar.
«Qazyǵurt aýdanynda kásipkerlik salasy turaqty túrde damýda. Damýdyń jarqyn kórinisi retinde «Óńirler kásipkerligin qoldaý» baǵdarlamasynan tys jalpy quny 135 mln. teńgelik 2 joba iske qosylǵanyn aitýǵa bolady. Olar: «Qazyǵurt aina» JShS-nyń suiyq shyny óndirisi – 85 mln. teńge, «UNIFRUTTI GOLD» JShS-nyń jemister men kókónisterdi óńdeý arqyly dietalyq piýreler shyǵarý óndirisi – 50 mln. teńge. Ónerkásip salasyndaǵy jetistikter jyl basynda josparlanǵan nátijege sai oryndalýda. Aýdan kóleminde búgingi tańda jumys istep turǵan 18 kásiporyn bar. Aǵymdaǵy jyldyń 10 aiynda óńirdegi ónerkásip kásiporyndarynda 5 mlrd. 633 mln. teńgeniń ónimi óndirilip, ótken jyldyń tiisti kezeńimen salystyrǵanda naqty kólem indeksi 103,9 paiyzdy qurady», - dedi Tólegen Turtaiuly.
