Foto: Gov.kz.
Qazyǵurt aýdanynda 2024 jyldyń 10 aiynda jalpy óńirlik ónim kólemi 96,4 mlrd teńgeni qurap, ótken jyldyń tiisti kezeńimen salystyrǵanda 14,2 paiyzǵa artyq oryndalǵan, dep habarlaidy «Ult aqparat».
Onyń ishinde, aýyl sharýashylyǵynda - 58,4 mlrd teńge, qurylys salasynda - 9,3 mlrd teńge, ónerkásipte - 12,1 mlrd teńge, saýda kólemi - 16,6 mlrd teńgeni qurady. Sondai-aq, aýdanǵa 2024 jyldyń 10 aiynda 36,2 mlrd teńge investitsiia tartylǵan. Bul jaiynda Qazyǵurt aýdanynyń ákimi Azizhan Ismailov BAQ ókilderimen ótken brifingte málimdedi.
«Qazyǵurt aýdanynda 2024-2030 jyldar aralyǵynda investitsiialyq quny 55,1 mlrd teńge bolatyn 45 joba iske asyrylyp, 1 364 adamdy jumyspen qamtý josparlanýda. Sonymen qatar, ónerkásip salasynda quny 30,8 mlrd teńgege 15 joba iske asyrylyp, 390 adam jumyspen qamtylmaq. Al, aýyl sharýashylyǵy salasynda quny 18,9 mlrd teńge bolatyn 18 jobany iske asyrý kózdelýde, nátijesinde 784 adam jumyspen qamtylmaq. Búginde aýdandaǵy Turbat aýylynda aýyl sharýashylyǵy men ónerkásiptiń ónim kólemin arttyrý úshin 60 gektar jer aýmaǵyna «Turbat» agroindýstrialdy aimaǵyn qurý josparlanýda. Atalǵan aimaqta 3,8 mlrd teńgege jylyjailar salynyp, 416 adam jumyspen qamtylmaq. Sonymen qatar, aýdanda biyl mal sharýashylyǵynda 35,6 mlrd teńgeniń ónimi óndirilse, egin sharýashylyǵynda 22,8 mlrd teńgeniń ónimi óndirilgen»,- dedi aýdan basshysy.
Budan bólek, aýdanda 2025-2030 jyldary týrizmdi damytý maqsatynda jalpy quny 3,3 mlrd teńge bolatyn 6 jobany iske asyrý josparlanýda. Jobalar iske asqan jaǵdaida aýdandaǵy týristik aimaqtyń áleýeti artyp, týrister sany eki esege artpaq. Sonymen qatar, aýdanda 2024-2030 jyldary tamaqtaný jáne saýda salasyndy 2,1 mlrd. teńgege 6 investitsiialyq jobany iske asyrý josparlanyp otyr.
Infraqurylymmen qamtý boiynsha aýdandaǵy 61 eldi mekeniń 59-y aýyz sýmen qamtylyp, qamtý kórsetkishi - 96,7%-ǵa jetken. Sondai-aq, 61 eldi mekenniń 60-y ortalyqtandyrylǵan elektr júiesimen qamtylyp, kórsetkish 98,4 paiyzdy qurap otyr. Sonymen qatar, 61 eldi mekenniń 49-y ortalyqtandyrylǵan tabiǵi gazǵa qosylyp, qamtý kórsetkishi 80,3 paiyz kóleminde.
