Ulytaýda Joshy han eskertkishin Qasym-Jomart Toqaev turǵyzsa, ult rýhy dúr silkiner dúnie bolar edi. Bul týraly búgin Ulttyq qoǵamdyq senim keńesiniń alǵashqy otyrysynda keńes múshesi Qazybek Isa aitty, dep habarlaidy QazAqparat tilshisi.
«Endigi máselemiz ulttyq rýhty kóterý - eń basty mindetimiz. Ulttyq múddeni qorǵaý ulttyq rýhty oiatýdan bastalady. Taiaýda ult tarihyndaǵy Ulytaýǵa Qasym-Jomart Toqaev Qazaqstan Prezidenti retinde tuńǵysh sapar jasap, ziiarat etip qaitty. Bosqa barǵan joq. Kúlli túrki álemine úlgi bolatyn ordaly oi aitty. Eýraziia keńistiginde erekshe zor alyp imperiia Altyn ordanyń 750 jyldyǵyn merekeleý týraly bastama kótergen Memleket basshysy: «Shyńǵys hannyń úlken uly Joshynyń mazary qazaq jerinde turǵanyn búginde elimizde jáne sheteldegi jurtshylyqtyń kópshiligi bile bermeidi. Onyń tarihi tulǵasyna álemniń nazaryn aýdaryp, kesenesin mádeni týrizm nysanyna ainaldyrý óte mańyzdy mindet», dep atap ótti. Memleket basshysynyń Ulytaý sapary men ulaǵatty sózderi rýhymyzdy kóterip, eńsemizdi biiktetti. Iá, Altyn ordanyń atasy Joshy hannyń tulǵasyn saqtaý - túgel túrki jurtyna ortaq is», - dedi ol.
Ulttyq keńes múshesi alyp imperiianyń alǵashqy astanasy Saraishyqta Altyn ordanyń tizginin balasy Batý hanǵa tapsyryp ketken ákesi, uly hanymyz Joshy da qazaq jerinde jatqanyn aitty.
«Birinshiden, Joshy hannyń Ulytaýda taqqa otyrǵanyna 2023 jyly 800 jyl tolady. Qazaq memleketi tarihyndaǵy eldik mańyzy erekshe zor bul mereitoi memlekettik deńgeide toilanýy tiis. Mine, Qazaqstan Prezidenti aitqandai, Joshy hanǵa álem nazaryn aýdarar naǵyz kezeń bastaldy deýge bolady. Osyndai álem tarihynda salmaǵy orasan sańlaq tulǵalar men mańyzdy zor qalalar ózge bir eldiń enshisinde bolsa ne bolar edi? Árige barmai-aq Memleket basshysy aitqan kishkentai Mońǵoliianyń ózi Joshy hannyń ákesi álemdi bilegen Shyńǵys han arqyly dúniejúzine dúbirin tanytyp jatyr. Múmkin biz de Shyńǵys hannyń alyp eskertkishindei Joshy hanǵa odan da kem emes eskertkish keshen turǵyzarmyz. Ol keshende Joshynyń anasy Bórte de, balasy Batý han da, ákesi Shyńǵys hannyń da eskertkishi tursa, tipti keremet bolar edi. Al Ulytaýda mazary jatqan Joshy hannyń eskertkishin Qazaqstan Prezidenti Qasym-Jomart Toqaev turǵyzyp jatsa, ult rýhy dúr silkiner dúnie bolar edi», - dedi Qazybek Isa.
