Foto: ál-Farabi atyndaǵy QazUÝ-dyń Baspasóz qyzmeti
Ál-Farabi atyndaǵy Qazaq ulttyq ýniversitetine Qazaqstan Respýblikasy Prezidentiniń keńesshisi Qýanyshbek Esekeev keldi.
Jumys sapary barysynda Memleket basshysynyń keńesshisi Ál-Farabi atyndaǵy QazUÝ-dyń Basqarma Tóraǵasy – Rektor Janseiit Túimebaevpen kezdesip, joǵary oqý ornynyń qyzmetimen tanysty.
Áńgimelesý barysynda taraptar jasandy intellektini damytý jáne «KazLLM» til modelin ázirleý máselelerin talqylady.
Ýniversitet basshysy Qýanyshbek Baqytbekulyna Memleket basshysy Qasym-Jomart Toqaevtyń jasandy intellektini damytý jónindegi tapsyrmasyn oryndaý aiasynda joǵary oqý ornynda atqarylyp jatqan jumystar týraly baiandady.
Aita ketsek, QazUÝ ǵalymdary Nazarbayev University, Aqparattyq jáne esepteý tehnologiialary institýty, Satbayev University, Sh.Shaiahmetov atyndaǵy «Til-Qazyna» UǴPO, A.Baitursynuly atyndaǵy Til bilimi institýtynyń mamandarymen birlesip «KazLLM» atty qazaq tilin jasandy intellekt arqyly damytýdyń modelin ázirleidi.
Qazirgi tańda QR Ǵylym jáne joǵary bilim ministrligi «KazLLM» úlken tildik modeliniń jobasyn ázirleý úshin derekter massivin jinap jatyr. Derekterdi jinaý nátijesinde qazaq tilin óńdeýdiń joǵary sapaly modeli jasalady. Bolashaqta bul avtomatty aýdarmany jaqsartýǵa ǵana emes, jalpy, qazaq tilindegi mátinderdi óńdeýdiń sapasy men dáldigin arttyrýǵa kómektesedi.
Kezdesýde Prezident keńesshisi Qýanyshbek Esekeev pen QazUÝ basshysy Janseiit Túimebaev osy baǵytta júrgizilip jatqan jumystardy pysyqtap, ózara pikir almasty.
Óz sózinde Qýanyshbek Esekeev «KazLLM» tildik modelin qurastyrý jáne damytý tikelei Prezidenttiń baqylaýynda ekenin aityp, ǵalymdardyń jumysyna tabys tiledi.
Júzdesýden soń Prezident keńesshisi QazUÝ bazasyndaǵy ǵylymi zerthanalardy aralap, ýniversitettiń ǵylymi áleýetimen tanysty.
Qaragóz Serikqyzy,
ál-Farabi atyndaǵy QazUÝ, Baspagerlik, redaktorlyq jáne dizainerlik óner
kafedrasynyń oqytýshysy
