Kollaj: "Egemen Qazaqstan"
Ál-Farabi atyndaǵy Qazaq ulttyq ýniversitetiniń Basqarma Tóraǵasy – Rektor Janseiit Túimebaev oqý ordasynyń oqytýshy-professorlar quramy jáne stýdent jastarmen kóshbasshylyq kezdesý ótkizip, Prezident joldaýyn talqylady.
JOO basshysy júzdesýde ádiletti Qazaqstandy qurýdaǵy jastardyń róline toqtalyp, Memleket basshysynyń bastamasymen elimizde oryn alyp jatqan eleýli ózgeristerge nazar aýdardy.
«Ádiletti Qazaqstandy bolashaq urpaqqa amanat etý – barshamyzǵa ortaq mindet» taqyrybyndaǵy sharaǵa fakýltet dekandary, ardager oqytýshylar, professorlar, jas ǵalymdar, bilim alýshy jastar jáne 1-kýrs stýdentteri jinaldy.
Rektor Qasym-Jomart Toqaevtyń biylǵy Qazaqstan halqyna joldaýy, eń aldymen, el ekonomikasyn jaqsartýǵa, halyqtyń ál-aýqatyn kóterýge, jastardyń tulǵalyq belsendiligin arttyrýǵa negizdelgen aýqymdy josparlardy qamtyǵanyn jetkizdi.
«Ádiletti Qazaqstan: zań men tártip, ekonomikalyq ósim, qoǵamdyq optimizm» atty joldaýda ǵylym jáne joǵary bilimdi damytý, úzdik ýniversitetterdiń naqty sektormen bailanysyn nyǵaitý máseleleri ortaǵa salyndy. Innovatsiialyq saiasatty elimizdiń ǵylymi-tehnologiialyq basymdyqtarymen úilestirý, joǵary oqý oryndaryndaǵy qoldanbaly ǵylymnyń áleýetin arttyrý qarastyryldy. Ulttyq múddelerdiń myzǵymastyǵy, ult ómiriniń sapasyn arttyrý, qaýipsizdik pen zań ústemdigin qamtamasyz etýge de airyqsha mańyz berildi. Bul tapsyrmalardyń biraz bóligin ýniversitet ómirinde iske asyryp jatyrmyz, aldaǵy ýaqytta da júieli jalǵastyratyn bolamyz», – dedi rektor.
Oqý ordasynyń basshysy bolashaq Qazaqstandy damytý, ádiletti qoǵam qurýda jastarǵa artylar senim mol ekenin aita kele, eń basty mindet bilimdi jáne bilikti maman bolý ekenin atap ótti.
«Prezident: «Bizdiń uzaq merzimge arnalǵan damý jolymyz aiqyn. Biik maqsattarymyz bar. Oǵan jetý úshin, eń aldymen, el birligin saqtai bilýimiz kerek. Bir-birimizge qoldaý bildirip, qurmet kórsetýimiz qajet», – dedi. Bul jalyndy jastardyń qolynan keletin dúnie. El birligin, ózara tatýlyqty saqtaý basty qaǵidaǵa ainalýy kerek. Prezident buǵan deiin de birneshe márte: «Táýelsizdik – eń qasietti, qasterli qundylyǵymyz, eń basty bailyǵymyz», – dep aitqan edi. Osy baǵa jetpes qundylyǵymyzdyń qadirin bilip, qýatty Qazaqstandy damytý – jastardyń qolynda. Ár adamǵa jáne barshaǵa birdei múmkindik beretin memleketti, iaǵni ádiletti Qazaqstandy bolashaq urpaqqa amanat etý – barshamyzǵa ortaq mindet», – dedi Janseiit Qanseiituly.
JOO rektory kezdesýde QR Prezidenti qoiǵan mindetter men maqsattardy oryndaýda ál-Farabi atyndaǵy QazUÝ airyqsha úles qosyp otyrǵanyn aitty.
«Memleket basshysy joldaýynda aldyńǵy qatarly 23 sheteldik joǵarǵy oqý ornynyń ashylǵanyn atap ótti. Sonyń ekeýi bizdiń ýniversitetimizde ashyldy. Atap aitqanda, Máskeý ulttyq iadrolyq zertteý ýniversiteti jáne Soltústik-batys politehnikalyq ýniversiteti. Buǵan deiin Ystambul jáne Bishkek qalalarynda Prezidenttiń qatysýymen QazUÝ filialy ashylǵan bolatyn. Aldaǵy ýaqytta F.M.Dostoevskii atyndaǵy Omby memlekettik ýniversitetinde QazUÝ filialyn iske qosý josparlanyp otyr», – dedi bilim ordasynyń basshysy.
Kóshbasshylyq kezdesýde Janseiit Qanseiituly oqý ordasy zertteý mártebesine ie bolǵandyqtan, ǵylymi áleýetti damytýǵa ýniversitet basa nazar aýdaratynyn aitty. Sondai-aq stýdentterdiń emin-erkin bilim alýy úshin ýniversitette atqarylǵan jumystarǵa toqtaldy.
Sózin qorytyndylai kele, Janseiit Qanseiituly stýdent jastardy ýaqytty tiimdi paidalanýǵa, jii kitap oqýǵa úndep, barshaǵa ortaq beibit ári jarqyn bolashaq qurý jolynda kúsh biriktirýge shaqyrdy.
Kezdesý sońynda latyn grafikasyna kóshý máselesi, Qazaqstannyń ózge memlekettermen yntymaqtastyǵy, qoǵamdaǵy turaqtylyq týraly birqatar suraqqa jaýap berdi.
Qaragóz SIMÁDIL,
Baspagerlik, redaktorlyq jáne dizainerlik óner kafedrasynyń oqytýshysy
