«QazTransGaz» kompaniiasy Almaty oblysyndaǵy gaz qubyrynan metannyń aǵyp ketýi týraly boljam jasalǵan sheteldik BAQ-tarda shyqqan aqparatty joqqa shyǵardy, dep habarlaidy "Ult aqparat" gaz jáne gazben jabdyqtaý salasyndaǵy ulttyq operatordyń baspasóz qyzmetine silteme jasap.
Kompaniianyń málimdeýinshe, birqatar sheteldik BAQ Eýropalyq ǵarysh agenttiginiń Sentinel-5P spýtniginiń sýreti men derekterin taldaýǵa silteme jasai otyryp, kúmándi aqparat taratqan. Onda 2021 jyldyń 24 shildesinde Almaty oblysyndaǵy gaz qubyrynan metannyń aǵyp ketýi týraly boljam jasalǵan. Habarlamada Kayrros SAS geoanalitikalyq kompaniiasynyń málimetteri keltirilgen, ol «shyǵaryndylar deńgeii saǵatyna 200 tonna metandy qurady» dep málimdelgen.
«Osyǵan bailanysty «QazTransGaz» AQ jariialanymdarda keltirilgen derekter shyndyqqa sáikes kelmeidi dep málimdeidi. «QazTransGaz» AQ óz obektilerinde qaýipsizdikti, sonyń ishinde ekologiialyq qaýipsizdikti qamtamasyz etýge úlken kóńil bóledi. Aqparat quraldarynda jariialaǵan 10 million tekshe fýt nemese 300 myń tekshe metr kólemindegi gazdyń aǵyp ketýi týraly málimetter shyndyqqa janaspaidy jáne kompaniianyń táýlik boiy jumys isteitin qaýipsizdikti baqylaý júiesiniń nazarynan tys qalýy múmkin emes.
«Aziialyq gaz qubyry» JShS (budan ári – «AGQ» JShS), sondai-aq «Buhara gazdy aýdany – Tashkent-Bishkek-Almaty» magistraldyq gaz qubyrynda jáne Almaty oblysynyń gaz taratý júielerinde atalǵan kúni (2021 jylǵy 24 shildede) tabiǵi gazdyń aýaǵa taralýy bolǵan joq», delingen habarlamada.
Ulttyq operatordyń málimdeýinshe, atalǵan koordinattarda «AGQ» JShS-nyń «Qazaqstan-Qytai» MGQ KS-6 ornalasqan. Osy «AGQ» JShS-nyń kompressorlyq stansasynda 2021 jyldyń 24 shildesinde atmosferaǵa 16,7 myń tekshe metr nemese 0,5 mln tekshe fýt kóleminde gaz aidaityn jabdyqtarǵa qyzmet kórsetý boiynsha josparly jumystar júrgizilgen. Barlyq rastaityn qujattar men aktiler bar.
Bul shyǵaryndylar Almaty oblysy boiynsha 2021 jylǵa arnalǵan «AGQ» JShS-nyń shyǵaryndylar kvotasyna kiredi.
«Gazdy qaýipsiz tasymaldaý úshin gaz qubyrlarynyń tutastyǵyna turaqty monitoring júzege asyrylady. Qural-jabdyqtar men qurylystardyń yqtimal zaqymdanýynyń aldyn alý jáne anyqtaý boiynsha jumystar júrgizilýde. Osy maqsattar úshin magistraldyq gaz qubyrlary boiynsha trassalardy ainalyp ushý jáne ainalyp ótý, al taratý jelileri boiynsha «DLS-PERGAM» gaz analizatoryn paidalana otyryp tekserý júrgiziledi», delingen habarlamada.
