Ulttyq ekonomika ministrliginiń Tabiǵi monopoliialardy retteý komiteti «QazTransGaz Aimaq» AQ-na 5 mln. teńgeden astam somaǵa aiyppul saldy, dep habarlaidy "Ult aqparat" vedomstvonyń baspasóz qyzmetine silteme jasap.
«QazTransGaz Aimaq» AQ Qazaqstan Respýblikasynyń Ákimshilik quqyq buzýshylyqtar týraly Kodeksiniń 166-babynyń ekinshi bóligi boiynsha investitsiialyq baǵdarlamany iske asyrýǵa qoldanylmaǵan somanyń on paiyzy kóleminde, somasy 5 340 143 teńgeni quraityn aiyppul salýmen ákimshilik jaýapkershilikke tartyldy», – delingen habarlamada.
Vedomstvo málimetinshe, «QazTransGaz Aimaq» AQ taýarlyq gazdy iske asyrý salasyndaǵy qoǵamdyq mańyzy bar naryq sýbektisi bola tura shekti baǵalarda eskerilgen investitsiialyq baǵdarlamanyń is-sharalaryn oryndaýǵa mindetti bolǵan. Alaida qoldanystaǵy zańnama talaptaryn buza otyryp, mekeme 2021 jylǵa taýarlyq gazdy kóterme iske asyrý qyzmeti boiynsha bekitilgen investitsiialyq baǵdarlamanyń is-sharalaryn oryndamaǵan.
