QR Ulttyq ekonomika ministrliginiń Tabiǵi monopoliialardy retteý, básekelestikti jáne tutynýshylardyń quqyqtaryn qorǵaý komiteti «QazTransGaz Aimaq» AQ-yna qatysty tekserýdi aiaqtady, dep habarlaidy "Ult aqparat" komitettiń baspasóz qyzmetine silteme jasap.
«Tergep-tekserý qorytyndysy boiynsha kompaniia kommýnaldyq-turmystyq jáne ónerkásiptik tutynýshylardan taýarlyq gazdyń shartty kólemin kem alǵany úshin aqshalai aiyppul óndirip alǵany anyqtalǵan. Bul rette aiyppuldy óndirýdiń ekonomikalyq, tehnologiialyq negizdemesi bolmaǵan, sondai-aq bul tutynýshyǵa qatysty kemsitýshilik sipatta bolyp tabylady», - delingen habarlamada.
Atalmysh fakti boiynsha ákimshilik is qozǵalyp, onyń materialdary sotqa beriledi.
Budan basqa, TMRB jáne TQQK kompaniiaǵa kemshilikterdi joiý, qarajatty qaitarý jáne gazdy kem alǵany úshin aiyppul alýdy kózdeitin talaptardy kelisimsharttardan alyp tastaý jóninde nusqaý jariialady.
2017 jylǵy 28 qarashada Astana qalasynyń soty kompaniiany ÁQBtK-niń 159-babynyń 4-bóliginde kózdelgen ákimshilik quqyq buzýshylyq jasaǵany úshin ákimshilik jaýapkershilikke tartý jáne memleket kirisine 944 855 296 (toǵyz júz qyryq tórt million segiz júz elý bes myń eki júz toqsan alty) teńge mólsherinde aiyppul túrindegi ákimshilik jaza qoldaný týraly qaýly etti.
