Jumysqa turý barysynda mindetti túrde memlekettik tildi bilý deńgeii eskerilýi tiis. Bul týraly «Uly dalanyń ultaralyq tili» respýblikalyq forýmynda Aqtaý qalasyndaǵy «Emir-Oil» JShS direktory Jamalail Elimhanov aitty, dep habarlaidy QazAqparat.
«Mańǵystaýda orys tilin jetik meńgergen qazaq basqa etnos ókilin kórgen bette áńgimeni aldymen qazaq tilinde bastaidy. Ózge ult ókili oryssha jaýap bergenniń ózinde de, qazaq tilin túsinedi degen sóz. Sol sebepti meniń jerlesterim áńgimeni ári qarai qazaqsha jalǵastyrady. Osylaisha ol ózge etnos ókiline qazaq tilin úirenýge túrtki bolady. Biz, qazaq halqy jáne ózge etnos ókilderi, memlekettik tildi úirengisi keletin jandarǵa osylai kómektesýimiz kerek. Olarmen qazaqsha sóileseiik Bul olardyń til úirenýge zor yntasyn týdyrady dep senemin», - deidi Jamalail Elimhanov.
Ol búgingi kúni qazaq tilin úirengisi keletin adam úshin barlyq jaǵdai jasalǵandyǵy týraly aitty.
«Qazaq tilin meńgerý deńgeiin baǵalaýdyń QAZTEST júiesin qoǵamnyń ártúrli salasynda engizý qajet. Jumysqa turý barysynda mindetti túrde memlekettik tildi bilý deńgeii eskerilýi tiis. Memlekettik tildi bilmeitin qyzmetker qansha jerden myqty maman bolsa da, memlekettik qyzmet atqarýǵa qaqysy joq dep esepteimin. Men ózim qazaq tilin 25 jasymda ǵana úirene bastadym. Eger men qazaq tilin úirenip alsam, onda kez-kelgen adam da meńgere alady degen sóz», - deidi ol.
