Sybailas jemqorlyqqa qarsy is-qimyl agenttiginiń tóraǵasy Marat Ahmetjanov Batys Qazaqstan oblysyndaǵy aqylǵa qonymsyz satyp alý konkýrsy týraly málimet berdi, dep habarlaidy "Ult aqparat".
Bul týraly ol vedomstvonyń birinshi jartyjyldyqtaǵy jumysyn qorytyndylaǵan alqa májilisinde aitty.
«Agenttik «Atameken» ulttyq kásipkerler palatasymen birlesip konkýrstyq satyp alý baǵalaryna monitoring pen taldaý júrgizýde. Mysaly, Batys Qazaqstan oblysy Kaztalov aýdanynyń ákimdigi aýdany 40-tan 60 sharshy metrge deiingi páterdi 30 mln teńgege satyp alýdy josparlaǵan. Mundai baǵa tipti elordada da joq ekeni anyq. Bizdiń usynysymyz boiynsha baǵa 6 esege (5 mln. teńge) tómendedi», – dedi agenttik basshysy.
Onyń aitýynsha, baǵany bulaisha qoldan kóterý kelisilgen parany óteý úshin qoldanylatyn kórinedi.
«Ótken jyly baǵany asyryp kórsetýdiń shyǵyndary 40 mlrd bolsa, biyl jarty jyldyń ózinde 36 mlrd teńgeniń alshaqtyǵy anyqtalyp otyr. Is júzinde bul problemalyq signal. Baǵany kóterý – aldaǵy ýaqyttaǵy para alý jáne qaitarýdyń alǵashqy qadamy», - dedi antikor basshysy.
Atalǵan máseleni sheshý úshin agenttik memlekettik josparlaý jáne memlekettik satyp alý portaldaryn biriktirip, biýdjettik ótinimderdi ornalastyrýdyń jariialylyǵyn, birtekti taýarlar úshin biryńǵai erekshelik pen naqty baǵabelgileýdi usynyp otyr.
