Ótken jyly «Qazposhta» AQ-nyń kiristeri 11 paiyzǵa artty. Bul týraly Astanada baspasóz máslihatynda basqarma tóraǵasy Sáken Sársenov málim etti, dep habarlaidy QazAqparat tilshisi.
«Ózderińiz biletindei 2018 jyly Qazposhta 25-jyldyǵyn atap ótti. Jyl qorytyndylarymyz da jaman emes. Mysaly, 2017 jylmen salystyrǵanda, kiristerimiz 11 paiyzǵa ósti. Aqshalai túrde bul kórsetkish 54,5 mlrd teńgeni qurady, al shyǵystar 54,2 mlrd teńgege jetti. Osylaisha, taza kiris 272 mln teńge qurady», - dedi «Qazposhta» basshysy.
Onyń sózine qaraǵanda, byltyr klientterge 18,6 mln sálemdeme jetkizilgen, olardyń 4,7 mln ishki naryqqa tiesili.
«2018 jyly biz klientterge jaqyn bolý úshin seriktestik jelisin iske qostyq. Búginde «Qazposhtamen» 160 franchaizi kásipkerler yntymaqtastyq ornatyp, 200 saýda núktelerin ashty. Olar arqyly 2 mlrd 600 mln teńge somasynda 493 myń tranzaktsiia júrgizildi», - dep naqtylady S. Sársenov.
Budan buryn habarlanǵandai, «Qazposhta» AQ basqarma tóraǵasy Qazaqstan aýmaǵyndaǵy elektrondyq kommertsiianyń jaǵdaiyna qatysty túsinik berdi.
Belgili bolǵandai, elimizde internet arqyly satyp alýshylar 2,3 millionnan asqan.
