Elordamyz Astana qalasynda Google kompaniiasynyń mamandary IT-kompaniialarynyń basshylary men mamandary, marketologtar, biznesmender, otandyq internet-dúken ieleri úshin meet up ótkizdi. Shara «Qazposhta» AQ uiymdastyrýymen zamanaýi tsifrlyq úrdisterge toly, jańa robopost keńsesinde ótkizildi. Google kompaniiasynyń mamandary qatysýshylarǵa jobalarmen tiimdi jumys isteýi jáne qyzmetkerlerdiń jeke ósýi úshin Google quraldaryn durys paidalaný jaiynda qyzyqty málimetterimen bólisti.
Meet up qonaqtary robopost keńsesindegi robot – Qýanyshpen tanysyp, suraqtar qoiyp, biraz aqparatpen bólisti. Shara ótken zaldyń túsirilimi drondar arqyly júrgizildi. Odan ózge Qazposhta qonaqtaryn VR kózildirigi kómegimen kiim-keshekti virtýaldy kiip kóretin qurylǵysymen tań qaldyrdy.
Sharaǵa Kazpost IT-bóliminiń atqarýshy direktory Bahtiiar Muhametqaliev qatysyp, keńse jaiynda aityp ótti.
«Bul keńsege alǵash ret robot Sofiia kelip ketken bolatyn, endi biz Google kompaniiasynan kelgen mamandardy qarsy alyp otyrmyz. Biz bolashaqty elektrondyq saýdamen bailanystyramyz. Ol úshin barlyq jaǵdaidy jasaýymyz qajet – qarjy quraldary, terminaldar, zamanaýi bankomattar, tólem kartochkalaryn shyǵarý, kiimdi onlain rejiminde kiip, ony basyp shyǵarý, alý nemese jiberý. Sondyqtan da osyndai keńseler ashyp, startaperlerdi shaqyramyz. Jalpy, biz kez kelgen ideialar men sheshimderdi qarastyryp, kóbine qoldap otyramyz», – dedi Bahtiiar Muhametqaliev.
Google kompaniiasynyń ókili Evgenii Ganchits sharaǵa qatysýshylarǵa ózderiniń izdeý júiesiniń qyr-syrymen tanystyryp, aityp berdi.
«Google – bul protsesterdi ońtailandyrýǵa múmkindik beretin jáne qazirgi kezde qajet nárseni tez arada tabýǵa jaǵdai jasap otyrǵan, óte aqyldy izdeý júiesi», – dep óz sózin bastady kompaniia ókili Evgenii.
Izdeý júiesiniń kásipkerge kómegi az ǵana. Odan ári oǵan internet tehnologiialar kómek bere alady, jáne de ol elektrondy saýda da óte qajet dúnie. Evgenii Ganchits bul jaiynda óz tájiribesindegi sátti jarnama arqyly internettegi qalyń jurtshylyqtyń nazaryn qalai aýdarý kerektigin aityp, onyń syrymen bólisti.
«Sizdiń isińiz týraly habarlandyrý qyzyqty bolýy kerek, bul dúkendegi sóreler sekildi adam kózin tartady, iaǵni alǵashqy áser qalyptastyrady. Eger siz eleýli kásipker bolsańyz, jarnamalyq mátin óte sapaly bolýy mańyzdy ról atqarady. Paidalanýshylar sizdiń saityńyzǵa nege kirgenin jáne ol jerden ózine ne alatynyn birden biletindei bolý kerek. Tutynýshylarǵa suraq qoiýdyń qajeti joq, kerisinshe – olardyń tarapynan qoiylǵan suraqtarǵa tez arada jaýap berýge daiyn bolýǵa tyrysyńyz. Túiindi sózder aityńyz, bos ýáde bermeńiz ol sizge degen senimdilikti arttyrady», – dep spiker biraz paidaly aqparattar usyndy.
Sondai-aq, ol búgingi tańda mobildi qurylǵylarǵa arnalǵan nusqany arzandatýdyń qajeti joq ekenin eskertip ótti. Eger siz saitta jumys istep júrseńiz - bul jóninde bilip júrińiz. Sebebi smartfondar men messendjerler, áleýmettik jeliler, arqyly tutynýshylar kóp keledi.
Odan keiin digital-marketingte jeti jyl tájiribesi bar Roman Leonov sóz sóiledi. Ol Qazaqstanda, Ázirbaijanda jáne Qyrǵyzstanda kýpondyq servisti damytýmen ainalysqan. Birneshe jyldan keiin óziniń Peklo agenttigin ashqan.
Sondai-aq, ol óz sózinde jeke saityn qalai qurý kerektigin, ony qalai rásimdeý kerektigin aityp, barlyq marketologtarǵa mindetti túrde Google Analytics qoldanýǵa keńes berdi.
«Sizderdi tutynýshylar jáne basqa da adamdar kartadan kórý úshin «Google meniń biznesim» bólimine tirkelińiz. Olar saitqa kirgen mezette operator oǵan kenetten jaýap berý kerek. Sondai-aq, áleýmettik jeliler men tipti óz blogyńyzdy júrgizý usynylady. Kóptegen gýgl analitikter osy tusta bas qatyrǵysy kelmeidi. Biraq siz den qoiyp ainalysyńyz, ol sizdiń biznesińizge jaqsy tabys ákeledi. Sondyqtan da ony ainalyp ótýdiń qajeti joq», – deidi Roman.
Meet up-ty digital-agenttikti damytýmen ainalysatyn Asiia Mambetalieva qorytyndylap ótti. Asiia óz kezeginde Google kompaniiasyna tiesili YouTube qyzmeti jóninde aityp berdi. Basty nazardy jarnamalyq beinerolikterde boldy.
Búgingi tańda Qazaqstan búkil álemde YouTube-ti kórý boiynsha alǵashqy pozitsiialardyń birin alady, sondyqtan bul jarnama úshin tamasha qural. Árbir sekýnd saiyn 1,5 milliard kórermen úshin 400 saǵattan astam kontent júkteledi.
«Ortasha eseppen alǵanda kórermen smartfonnan beine kórý úshin kúnine bir saǵattan astam ýaqyt ótkizedi. Búginde biz sapaly kontentti qalaimyz – bul óz kezeginde jarnama berýshilerdi shaqyrý. YouTube-ta beine jarnamalardyń kóp túrleri bar. Biraq eń jańalary tómengi jaǵynda kórinip turady», – dedi Ásiia Mámbetalieva.
Ol sondai-aq, qazaqstandyq YouTube-da kazino men brendti jarnamalaýǵa tyiym salynǵanyn da eskertip ótti. Sharaǵa qatysýshylar meditsinalyq dári-dármekterdiń jarnamasyna qyzyǵýshylyq tanytty. Onyń aitýy boiynsha meditsinalyq dári-dárimekterdi jarnamalaýǵa ábden bolady. Tek beinerolikter qyzyqty bolyp kópshilikti ózine tartatyndai bolsa boldy.
Áigerim QALIDOLLA
