Foto: Akorda.kz
Memleket basshysy «QazMunaiGaz» UK» AQ basqarma tóraǵasy Maǵzum Myrzaǵalievti qabyldady, dep habarlaidy "Ult aqparat" Aqordanyń resmi saityna silteme jasap.
Qasym-Jomart Toqaevqa ulttyq kompaniia qyzmetiniń nátijesi jóninde málimet berildi. Biylǵy 8 aida munai jáne gaz kondensatyn óndirý, munai tasymaldaý jáne qaita óńdeý kórsetkishteri boiynsha ósim bar ekeni atap ótildi.
Maǵzum Myrzaǵalievtiń aitýynsha, «QazMunaiGaz» UK» AQ munaidyń otandyq brendi KEBCO (Kazakhstan Export Blend Crude Oil) óndirisin bastady. Qazirgi tańda KEBCO munaiynyń eksport kólemi turaqty túrde artyp keledi. Bul rette KEBCO munaiynyń baǵasy biylǵy tamyz aiynda Brent munai markasynyń baǵasynan asyp tústi.
Sondai-aq Prezidentke munai óńdeý zaýyttarynan janar-jaǵarmai jóneltý qarqyny, sonyń ishinde kúzgi jiyn-terin maýsymynda aýyl sharýashylyǵy taýaryn óndirýshilerdiń qajettiligin qamtamasyz etý isi jóninde baiandaldy. Atap aitqanda, «QazMunaiGaz» kompaniiasy egin jinaý naýqanyna 426 myń tonna dizel otynyn bólgen.
Sonymen qatar Memleket basshysyna kompaniianyń tanker flotyn keńeitý, sonyń ishinde Kaspii teńizi men basqa da ashyq teńiz akvatoriialarynda energetikalyq resýrstardy tasymaldaýǵa arnalǵan iri tonnajdy tankerler sanyn kóbeitý jumystary týraly málimet berildi.
Qasym-Jomart Toqaevqa ulttyq kompaniianyń óńirlerde júzege asyryp jatqan áleýmettik jobalary jóninde esep berildi. Atap aitqanda, Prezidentke Mańǵystaý oblysynyń Jańaózen qalasyn aýyzsýmen qamtamasyz etý úshin jańa sý tushytý zaýytynyń qurylysy bastalǵany jáne Astrahan – Mańǵyshlaq magistraldy sý qubyryn rekonstrýktsiialaý jumystarynyń barysy jóninde baiandaldy.
Kezdesý sońynda Memleket basshysy investitsiialyq jobalardy júzege asyrý, kómirsýtegi eksportyn arttyrý jáne geologiialyq barlaý jumystarynyń aýqymyn keńeitý jóninde birqatar naqty tapsyrma berdi. Sondai-aq Prezident munai men gazdy tereń óńdeý salasyna basa mán berý mańyzdy ekenin atap ótti.
