Foto: Sputnik / Arman Askarov
"QazMunaiGaz"UK" AQ tóraǵasynyń orynbasary Nurseiit Soiýnov zańsyz ereýilge qatysyp jatqan Mańǵystaý oblysyndaǵy "West Oil Software" kásipornynyń qyzmetkerlerin jumysqa oralýǵa shaqyrdy, - dep habarlaidy «Ult aqparat» Lada.kz-ke silteme jasap.
"Meni bilesizder, men Mańǵystaýdan keldim, munai-gaz salasynda kóp jyl jumys istedim. Jerlesterińiz retinde sizderdi de 143 adam sekildi jumysqaqaita oralyp, otbasylaryńyzdy oilaýǵa shaqyramyn, - dedi Soiýnov.
Beinejoldaýynda ol kelissóz barysynda jumysshylar QMG-ǵa qabyldaýdy, ulttyq kompaniiada qabyldanǵan biryńǵai eńbekaqy júiesin qoldanýdy jáne kásiporynnyń jabdyqtaryn jańartýdy talap etkenin aitty.
"QMG ereýilshilerdiń sońǵy talabymen kelisti, ázirlengen baǵdarlamaǵa sáikes úsh jyl ishinde jabdyq jańartylady. Alaida West Oil Software komandasyn "QazMunaiGaz" ujymyna qabyldaý jáne biryńǵai eńbekaqy júiesine kóshý talaptaryn oryndaý múmkin emes", - dedi ulttyq kompaniia tóraǵasynyń orynbasary.
Soiýnovtyń aitýynsha, kólik parkin jańǵyrtý aiasynda QMG ony jańartý bastamasyn kóterdi.
"Jumysshylar qoiǵan negizgi talaptarǵa sáikes, mekemeniń qural-jabdyqtaryn jańartyp, sapaly eńbek jaǵdaiyn qamtamasyz etý maqsatynda úsh jyldyq kezeńge 202 birlik tehnikany jańartý jospary bekitildi, 2023 jyly 17 tehnika, 2024 jyldyń basynan bastap barlyǵy 4 tehnika satyp alyndy jáne paidalanýǵa berildi. Osy jyldyń sońyna deiin 70 tehnikany jańartý josparlanýda", - dedi ol.
Aqpandaǵy ereýilden keiin óz qyzmetine qaita oralýǵa sheshim qabyldaǵan 143 qyzmetker qalypty tártipte jáne eshqandai saldarsyz jumysyn jalǵastyrdy.
"3-shi razriadtaǵy jóndeýshilerge – 413 myń teńge, 4-shi razriadtaǵy jóndeýshilerge – 499 myń teńge, 5-shi razriadtaǵy júrgizýshilerge – 1 million 156 myń teńge, 6-shy razriadtaǵy júrgizýshilerge – 1 million 196 myń teńge berildi", – dep málimdedi QMG ókili.
Sonymen qatar kompaniia qyzmetkerleriniń áleýmettik paketi bar jáne ol mynalardy qamtidy:
memlekettik merekede 50 AEK mólsherinde syiaqy,
125 AEK mólsherinde eńbek demalysynyń tólemi,
balabaqshalar men demalys lagerleriniń shyǵynyn óteý;
sondai-aq nekege turýǵa, bala týýǵa bailanysty jáne 13-shi jalaqyny tóleý boiynsha materialdyq qoldaý kórsetý.
"West Oil Software" kompaniiasynyń áleýmettik paketiniń is júzinde "QazMunaiGazdan" esh aiyrmashylyǵy joq", - dedi Soiýnov.
Onyń aitýynsha, 11 naýryzdan beri ereýilge shyqqan jumysshylardyń ókilderimen kelissózdiń birneshe raýndy ótkizilip, onda eńbek daýyna qatysty jaǵdailar talqylanǵan.
"Zańsyz ereýilge qatysýshylar suraǵan QR Eńbek kodeksiniń 173-174-baptaryn qoldaný múmkin emes, óitkeni ereýildi zańsyz dep taný týraly sot sheshimi bar", - dep túsindirdi "QazMunaiGaz" basshysynyń orynbasary.
Osylaisha "West Oil Software" ujymyn "QazMunaiGaz" ujymyna berý jáne biryńǵai eńbekaqy júiesine kóshý talaptaryn oryndai almaimyz, dep málimdedi Soiýnov.
