QazMunaiGaz basqarma tóraǵasynyń orynbasary Dáýren Qarabaev ulttyq kompaniiadaǵy basqarma músheleriniń ailyǵyn ashyp aitýdan bas tartty, dep habarlaidy Ulysmedia.kz portaly.
Búgin ulttyq kompaniianyń úsh aidaǵy jumysynyń kórsetkishin baspasóz máslihatynda Dáýren Qarabaev baian etti. Suraq-jaýap kezinde Qarabaevqa joǵarydaǵy suraq qoiyldy.
«Jańa Qazaqstanda ashyqtyqqa, transparenttilikke basa mán berilip jatyr ǵoi. Siz ózińizdiń jáne basqarma músheleriniń, atap aitqanda basqarma tóraǵasynyń, onyń orynbasarlarynyń, atqarýshy direktordyń ailyǵyn aita alasyz ba?» - degen suraq qoiyldy Qarabaevqa Ulysmedia.kz portalynan.
Bul suraqqa jaýap berýge oqtalǵan Dáýren Qarabaev aldymen QazMunaiGaz basshylarynyń ailyǵy jyldyq esepti jariialaý kezinde aitylatynyn atap ótti.
«Jyldyq esep kompaniianyń saityna ornalastyrylǵan. Ár adamnyń ailyǵy qansha ekenin biz aita almaimyz, óitkeni ol ár adamnyń jeke málimeti bolyp sanalady. Bizdiń veb-saittaǵy jyldyq esebinde kórsetilgen aqparatqa qarasańyz, ol bylai keltirilgen: 2021 jyldyń qorytyndysy boiynsha direktorlar keńesiniń jalpy syiaqysy 181 mln teńge. Al basqarma múshelereniki – 228 mln teńge», - dedi ol.
«Siz jalpy aityp tursyz? Jeke-jeke aita almaisyz ba?» degen suraqqa Dáýren Qarabaev irkilip qaldy. «Joq degende óz ailyǵyńyzdyń mólsherin?» degen ekinshi suraq qoiylǵanda ol aqparat «jeke málimetterge jatatyndyqtan, ony ázirge aita almaimyz» dep jaýap berdi.
Aita ketsek «QazMunaiGaz» UK AQ basqarma músheleriniń qatarynda basqarma tóraǵasy Maǵzum Myrzaǵalievtiń tórt orynbasary bar. Olar: Dáýren Qarabaev (Basqarma tóraǵasynyń ekonomika jáne qarjy jónindegi orynbasary), Qurmanǵazy Esqaliev (Basqarma tóraǵasynyń barlaý jáne óndirý jónindegi orynbasary), Murat Muńbaev (Basqarma tóraǵasynyń iri munai-gaz jobalary jónindegi orynbasary) jáne Dastan Abdýlǵafarov (Basqarma tóraǵasynyń strategiia, investitsiialar jáne biznesti damytý jónindegi orynbasary).
Al direktorlar keńesi myna adamdardan quralǵan: Ýolton Kristofer Djon (Direktorlar keńesiniń tóraǵasy, táýelsiz direktor), Maǵzum Myrzaǵaliev (basqarma tóraǵasy), Uzaqbai Qarabalin («Samuryq-Qazyna» AQ múddeleriniń ókili), Ernar Janádil («Samuryq-Qazyna» AQ múddelerin bildirýshi), Ǵibrat Aýǵanov («Samuryq-Qazyna» AQ qoǵammen bailanys jáne ózgeristerdi basqarý jónindegi basqarýshy direktory), Holland Filip Malkolm (táýelsiz direktor), Miller Timoti Glen (táýelsiz direktor).
