«QazMunaiGaz» UK» AQ 2020 jylǵy negizgi qarjylyq kórsetkishterin jariia etti, dep habarlaidy QazAqparat.
«QMG úshin 2020 jyl kúrdeli kezeńge ainaldy. Degenmen, kompaniiamyz barlyq qiyndyqty eńsere bildi. 2020 jyly QMG qarjylyq nátijelerine munai baǵasynyń quldyraýy, OPEK+ kelisimi aiasynda munai óndirýdi shekteý jáne koronavirýs indeti siiaqty faktorlar edáýir yqpal etti. Biraq syrtqy syn-tegeýringe qarsy turý úshin der kezinde qolǵa alynǵan is-sharalar biz boljaǵannan da jaqsy kórsetkishterge jetýge múmkindik berdi. QMG bul joly munai baǵasynyń tómendeýine barynsha daiyn bolyp shyqty. 2020 jyldyń qorytyndysy boiynsha kompaniia oń bos aqsha aǵynyn qamtamasyz etip, kredittik reitingterdi saqtai aldy. Qarjylyq kovenanttardyń buzylýyna jáne qaryzdyń ósýine jol berilmedi», - dedi QMG Basqarma tóraǵasynyń orynbasary Dáýren Qarabaev.
Onyń dereginshe, Túsim 2019 jylǵy 6 859 mlrd teńgemen salystyrǵanda, 2020 jyly 4 556 mlrd teńgeni qurady. EBITDA kórsetkishi 1 151 mlrd teńge boldy. Kompaniianyń taza paidasy 172 mlrd teńgege jetti. Bos aqsha aǵyny 88 mlrd teńgeni qurady. 2020 jylǵy 31 jeltoqsanda kompaniianyń taza qaryzy 6 162 mln AQSh dollarǵa jetip, 2019 jyldyń sońyndaǵy kórsetkishpen salystyrǵanda 0,2 paiyzǵa tómendedi. Taza qaryz 2019 jylǵy 31 jeltoqsandaǵy kórsetkishpen salystyrǵanda 2020 jylǵy 31 jeltoqsanda 3,4 paiyzǵa tómendep, 9 690 mln AQSh dollaryn qurady.
