Búgingi kúnniń qaterli indeti koronavirýstyń taralýy álem boiynsha jáne elimizde áli de sharyqtaý shegine jetpegendikten, Memleket basshysy Tótenshe jaǵdai rejimin qamtamasyz etý jónindegi memlekettik komissiianyń 10 sáýirdegi otyrysynda karantin rejiminiń aidyń aiaǵyna deiin sozylatyndyǵy týraly sheshimin jariialady. Indetke qarsy kúres sharalarynyń eń tiimdisi – adamdardyń áleýmettik oqshaýlanyp, karantin rejimin qatań saqtaýy ekendigin álem elderiniń tájiribesi jáne koronavirýstyń taralýyn báseńdetýge baǵyttalǵan shuǵyl sharalardyń elimizdiń iri qalalaryndaǵy nátijeliligi kórsetip otyr. Degenmen áli de indetti tolyq jeńý úshin qosymsha sharalar júrgizý qajet.
Qazaqstannyń COVID-19 álemdik pandemiiasyna qarsy kúres sharalary jáne sonyń saldarynan týyndap otyrǵan áleýmettik-ekonomikalyq máselelerdi eńserý tájiribeleri, halyqqa jáne kásipkerlerge kórsetilip otyrǵan kómek túrleri halyqaralyq qaýymdastyqtyń oń baǵasyn alyp otyr. Berilgen baǵa Memleket basshysynyń sheteldik áriptesterimen telefon arqyly bailanysy barysynda kórinis tapty. Sonymen qatar QR Prezidenti Q.Toqaev eldegi júrgizilip jatqan sharalar jaily beinekonferentsiia formatynda ótken Túrki tildes memleketteri yntymaqtastyq keńesiniń (TTMYK) tótenshe sammitinde baiandap, búgindegi jahandyq daǵdarysqa toitarys berý úshin ortaq kúsh shumyldyrýǵa shaqyrdy.
Atalǵan jiyn barysyndaǵy Memleket basshysynyń qoǵamdyq densaýlyq saqtaý júiesin jetildirý, ekonomikany jedel túrde tsifrlyq platformaǵa kóshirýge bailanysty kótergen bastamalary Qazaqstannyń ishki jaǵdaiynda de aldaǵy ýaqytta kún tártibiniń basty jáne mańyzdy máseleleri bolmaq. Sebebi COVID-19 indeti osy baǵyttaǵy biraz qordalanǵan máselelerdiń bar ekendigin aiqyn kórsetti.
Kóptegen bedeldi halyqaralyq sarapshylardyń paiymdaýynsha, qazirgi álem jurtshylyǵy bastan keship otyrǵan syn-qaterler keleshekte jańa álemdik tártipti, múldem basqa ekonomikany qalyptastyrady. Soǵan daiyn bolý, qazirgi jaǵdaidy múmkindik retinde paidalanyp, turaqty damýdyń jańa belesine shyǵý – elimizdiń basty ári ýaqyt kúttirmeitin máselesi. Sol sebepti Qazaqstan halqynyń bereke-birliginiń arqasynda jahandyq indetpen kúresti eńserip, alǵa qarai nyq senimmen, joǵary jaýapkershilikpen qadam basýymyz qajet.
Aita keterligi, koronavirýs pandemiiasynyń zardabyn barlyq álem elderi tartyp otyr. Osy oraida BUU Bas hatshysy Antoniý Gýterrish Qaýipsizdik keńesiniń jabyq otyrysynda COVID-19 indetiniń saldarynan qoǵamda narazy kóńil-kúi men zorlyq-zombylyqtyń kóbeiip ketýi, lańkesterdiń biologiialyq qarýmen shabýyl jasaýǵa umtylýy múmkin ekeni týraly aitty. Bul, óz kezeginde, keleshekte ekonomikalyq damýmen qatar qaýipsizdik máseleleriniń de ózektiligi artatyndyǵyn ańǵartady.
Ásel Nazarbetova
QR Prezidenti janyndaǵy QSZI
halyqaralyq zertteýler bóliminiń basshysy
