Qazirgi kezeń – ózgerister men serpilister, irgeli izdenister kezeńi. Kez kelgen ultqa udaiy jańaryp, jańǵyryp otyrý tán. Bul týraly búgin Almatyda ótken jiyn barysynda qala ákimi Baqytjan Saǵyntaev aitty, dep habarlaidy QazAqparat.
«Búgin bizdiń áńgimemizdiń ult rýhaniiatynan, óskeleń urpaqtyń boiynda ulttyq qundylyqtardy durys tárbieleý máselesinen bastalǵany óte oryndy», - dedi ákim.
Qala basshysy Almatynyń ziialylary qazirgi kezeńde rýhani damýdyń jańa paradigmasyn qalyptastyrýda óte uqypty ári eleýli jumysty qalai durys qurý týraly óz paiymdaýymen bólisetinine senim bildirdi.
«Joldaýda Memleket basshysy «qazaq ziialylarynyń jańa kezeńdegi mindeti – ult bolmysynyń jańa qaǵidattaryn ornyqtyrý» dep qashan da el ainasynyń ólshemi, baǵyt-baǵdary bolyp tabylatyn ziialy qaýymnyń mindetin taiǵa tańba basqandai anyq kórsetken.
Shynynda da, álemniń ózgergenin kórip otyrmyz. Qazirgi kezeń – ózgerister men serpilister, irgeli izdenister kezeńi. Kez kelgen ultqa udaiy jańaryp, jańǵyryp otyrý tán«,- dedi ol.
Almaty ákimdiginiń pandemiiadan túigeni – bul ulttyń jańa sapasy, onyń básekege qabilettiligi men intellektýaldyq áleýeti, eń aldymen:
- densaýlyq saqtaý júiesine;
- bilim berý júiesine;
- aýqymdy tsifrlandyrý arqyly innovatsiiaǵa ashyqtyqqa;
- ulttyń ýaqyt talabyna beiimdelý qabiletine jáne ótkeni, búgingisi men bolashaǵy úshin óziniń joǵary jaýapkershiligin túsinýine bailanysty.
«Bul jumys úshin negiz bar. Onyń negizi Elbasynyń 5 institýtsionaldyq reformany iske asyrý jónindegi Ult josparynda, sondai-aq «Rýhani jańǵyrý» qoǵamdyq sanany jańǵyrtý baǵdarlamasynda qalandy. Birinshiden, Almaty úshin qala turǵyndarynyń densaýlyǵyn saqtaý máselesi óte mańyzdy, óitkeni memleket pen qoǵamnyń basqa da mańyzdy faktorlary densaýlyq pen ómir sapasyna tikelei bailanysty. Muny pandemiia aiqyn kórsetti. Búginde indet tolqynyn aýyzdyqtaǵannan keiin jaǵdai turaqtaldy. Aýrý juqtyrý qarqyny da, aýqymy da tómendedi. Bul búkil memlekettiń úlken jumysynyń nátijesi. Biz qalada pandemiianyń kúzde qaita bastalýyna daiynbyz. Jaǵdai maýsymdyq tumaý men jedel respiratorlyq virýstyq infektsiia aýrýynan ýshyǵýy yqtimal. Jalpy, Almatyda densaýlyq saqtaý júiesin qoldaýǵa jáne indetpen kúresýge 68 mlrd teńge bóldik. Bul qarajat qosymsha infektsiialyq jáne provizorlyq statsionarlardy uiymdastyrýǵa, dári-dármektermen, meditsinalyq jabdyqtarmen jáne jeke qorǵaný quraldarymen qamtamasyz etýge, meditsina qyzmetkerlerin jatyn orynmen, ystyq tamaqpen qamtamasyz etýge jáne olarǵa ústemeaqylar men ótemaqylar tóleýge jumsaldy», - dedi ákim.
Onyń aitýyna, ulttyń jańa sapasy, jahandyq synaqtar kezeńinen shyǵý serpilisi, halyqtyń rýhani jáne dúnietanymdyq densaýlyǵy bilim berý júiesinsiz múmkin emes.
«Almatyda biz aýqymdy tsifrlandyrýǵa kóshe bastadyq. Qalanyń barlyq oqýshylaryn onlain qashyqtan oqytý úshin jalpyqalalyq «Sfera» platformasy quryldy. Oqýshylarǵa arnalǵan jańa tsifrlyq bilim berý kontenti daiyndaldy. Oqytýshylar quramy oqýdan ótti.
Sonymen qatar, barlyq balalarǵa, eń aldymen az qamtylǵan otbasylarǵa qajetti noýtbýk men planshetter satyp alyndy.
Biz jastardyń innovatsiialarǵa ashyqtyǵyn qalyptastyrýǵa basa nazar aýdaramyz. Arnaiy tsifrlandyrý basqarmasyn qurdyq. 2025 jylǵa deiin tsifrlandyrýdyń qoldanbaly strategiiasy ázirlendi«, - dedi B. Saǵyntaev.
