Memleket basshysy Qasym-Jomart Toqaevtyń tapsyrmasymen qurylǵan úkimettik komissiia Qordai aýdanyndaǵy oqiǵanyń saldaryn joiý jumystaryn júrgizip, Jambyl oblysy aýmaǵyndaǵy qaqtyǵystyń sebebin anyqtap jatyr, dep habarlaidy "Ult aqparat".
Úkimettik komissiiany Premer-Ministrdiń orynbasary Berdibek Saparbaev basqarady.
Eske salsaq, 7 aqpanda Qordai aýdany Masanchi aýylynda turǵyndar arasynda toptasqan sipattaǵy tóbeles bolǵan edi. Oqiǵanyń saldarynan 80-nen astam adam meditsinalyq mekemelerge júginip, 10 adam kóz jumǵan. Qazirgi tańda jansaqtaý bóliminde 7 adam jatyr. Aldyn ala málimetter boiynsha, qaqtyǵys kezinde 30-dan astam jeke úi, 15 saýda nysany men 23 avtokólik zaqymdalǵan. Tártipsizdik kezinde politsiia qyzmetkerleri de oqtan jaraqat alǵan. Jambyl oblysy IID tergeý bólimi QR QK 293-baby (buzaqylyq) boiynsha sotqa deiingi tergeý amaldaryn júrgizip jatyr.
8 aqpanda Memleket basshysy Jambyl oblysyndaǵy oqiǵaǵa bailanysty málimdeme jasady. Qazaqstan Prezidenti Qasym-Jomart Toqaev Twitter-de bolǵan oqiǵaǵa túsinikteme berdi. «Jambyl oblysyndaǵy tártipsizdikke kináli adamdar jazalanady» dep jazdy Memleket basshysy.
Jambyl oblysy ákiminiń baspasóz qyzmetinen habarlaǵandai, 8 aqpanda tústen keiin Qazaqstan Respýblikasy Premer-Ministriniń orynbasary Berdibek Saparbaev basqaratyn Qordai aýdanyndaǵy oqiǵalardyń saldaryn joiý jónindegi úkimettik komissiia Jambyl oblysyna kelip jetken.
Komissiia quramyna Jambyl oblysynyń ákimi A.Myrzahmetov, Eńbek jáne halyqty áleýmettik qorǵaý ministri B.Nurymbetov, Qazaqstan halqy Assambleiasy tóraǵasynyń orynbasary J.Túimebaev, Parlament Májilisiniń depýtaty Sh.Hahazov jáne «Qazaqstan dúngenderi qoǵamy» qoǵamdyq birlestiginiń tóraǵasy A.Vointse kirgen. Sonymen qatar komissiia quramynda qarjy, indýstriia jáne infraqurylymdy damý birinshi vitse-ministrleri, aqparat jáne qoǵamdyq damý, ulttyq ekonomika, densaýlyq saqtaý, bilim jáne ǵylym vitse-ministrleri, ishki ister ministriniń, Bas prokýrordyń orynbasary jáne Ulttyq qaýipsizdik komitetiniń tóraǵasy engen.
«Qordai aýylynda vitse-premer aýrýhanaǵa baryp, tóbeles kezinde zardap shekken turǵyndarmen sóilesti, - dep habarlady aimaq basshysynyń baspasóz qyzmetinen. - Bes patsient jedel járdem kóligimen Almaty qalasyna, bir naýqas Taraz qalalyq aýrýhanasyna jetkizildi. Barlyǵyna qajetti meditsinalyq kómek tolyq kólemde kórsetilip jatyr. Sodan keiin Sortóbe aýylynyń Mádeniet úiinde komissiia músheleriniń aqsaqaldarmen kezdesýi ótti».
Qordai aýdanynyń Masanchi, Sortóbe, Aýqatty jáne taǵy basqa dúngen diasporasy kóp turady. HIH ǵasyrdyń ekinshi jartysynda Qytaidaǵy kóterilis kezinde aiaýsyz janyshtalǵan dúngender qysta Tian-Shannyń qarly taýlary arqyly qazirgi Qazaqstan men Qyrǵyzstan aýmaǵyna ótip ketip, olardy jergilikti halyq qushaq jaia kútip alǵan.
Sortóbe aýylynda Berdibek Saparbaevpen kezdesýge jinalǵan aqsaqaldardyń aitýynsha, dúngender Jambyl óńirinde 140 jyldan beri turyp keledi.
«Mundai qaqtyǵystar eshqashan bolǵan emes, - dep atap kórsetti olar. - Jastardyń bilimine kóp kóńil bólip, jiberilgen qatelikterden qorytyndy shyǵarý kerek».
«Sizderden, qoǵamda bedeli bar aqsaqal retinde turǵyndardan jaǵdaidy obektivti túrde anyqtaýǵa kelgenimizdi túsindirýdi suraimyz. Kináliler jazalanady. Barlyq zardap shekkenderge qajetti meditsinalyq jáne basqa da kómek kórsetiledi. Qazir basty másele - aimaqtaǵy qaýipsizdikti qamtamasyz etý», - dedi jinalǵandardyń aldynda Berdibek Saparbaev.
Brifingte úkimettik komissiia músheleri jýrnalisterdiń suraqtaryna jaýap berip, ary qarai qandai jumystardyń atqarylatynyn aityp berdi. Qordai aimaǵynda úkimettik komissiia Qordai, Masanchi, Aýqatty, Sortobe eldi mekenderindegi qazirgi jaǵdaimen tanysyp, jergilikti turǵyndarmen, oqiǵadan qaza tapqandardyń otbasylarymen birqatar kezdesý ótkizedi. Zardap shekkenderge baryp, turǵyn úilerdi, áleýmettik jáne kommertsiialyq nysandardy tekseredi. Áleýmettik-ekonomikalyq jáne gýmanitarlyq sipattaǵy máselelerdi sheshý jónindegi sharalardy qabyldaidy.
Jambyl oblysynyń ákimdigimen birge qaza bolǵandardy jerleýdi uiymdastyrý, keltirilgen zalaldy baǵalaý jáne búlingen múlikti qalpyna keltirý boiynsha jumystar atqarylady.
Qordaida ótken baspasóz máslihaty kezinde Jambyl oblysynyń ákimi Asqar Myrzahmetov atap ótkendei, aldyn-ala málimetter boiynsha, oqiǵaǵa myńǵa jýyq adam qatysqan. Qazirgi ýaqytta ustalǵan 47 adam Qordai aýdandyq politsiiasynda. Tártipsizdik kezinde ustalǵan, keiin oqiǵaǵa qatysy joqtyǵy anyqtalǵannan keiin Aýqatty aýylynyń 44 turǵyny qamaýdan bosatylǵan.
«Túngi úshte qosymsha kúsh kelgennen keiin politsiia ustaý sharalaryn júrgizý múmkindigine ie boldy. Tańerteń tóbeleske qatysqan basty adamdar politsiianyń kelip jatqanyn kórip, kete bastaǵan. Jaǵdaidy baqylap qalǵan adamdar quqyq qorǵaý organdarynyń qyzmetkerleriniń nazaryna ilingen», - dedi aimaq basshysy.
Qazirgi ýaqytta jaǵdai turaqty. Jambyl oblysy ákiminiń baspasóz qyzmetiniń habarlaýynsha, quqyq qorǵaý organdarynyń qyzmetkerleri qoǵamdyq tártipti buzǵandardy anyqtap, ustap jatyr.
