Joldaýdy tiimdi júzege asyrý kóptegen memlekettik institýttyń taǵdyryn sheshedi. «B2C consulting group» basqarýshy seriktesi, Prezidenttiń kadrlar rezerviniń múshesi Aleksandr Danilov QR Prezidentiniń Qazaqstan halqyna Joldaýyna qatysty osyndai pikir aitty, dep habarlaidy QazAqparat.
«Shyndyǵynda, qazir eldi damytý úshin tiimdi sharalar qabyldaý óte mańyzdy. Qoǵam óz quqyǵyn qorǵap, olardyń saqtalýyn talap ete bastaidy. Daǵdarystardyń eń jaǵymdy tusy – qalyptasqan qatynastardyń jańǵyrýy. Joldaý qurylymdyq reformalardyń negizin qalady: ákimderdi sailaý qajettiligi jáne tek memleketke ǵana emes, kvazimemlekettik sektorlarǵa da jariialylyq talap etildi jáne tikelei onlain petitsiialardyń jańa quraly týraly aityldy. Internettegi petitsiialardy engizý ideiasy qoǵamda burynnan kele jatqanyn, biraq qazir ony júzege asyrýǵa eń qolaily ýaqyt ekenin atap ótken jón», - deidi Aleksandr Danilov.
Onyń aitýynsha, Memleket basshysy Qasym-Jomart Toqaev qazaqstan halqyna Joldaýynda ekonomika máselelerine kóbirek toqtalyp ótti.
«Joǵaryda aitylǵandardan basqa, Joldaýdyń ekonomikalyq bólimi aýqymdy. Prezident biznes pen úkimet arasyndaǵy qatynastardyń ekojúiesindegi túbegeili ózgeristerge daiyn ekenin kórsetti, sondyqtan bizdi osy baǵytta belgili bir deńgeide liberilizatsiia kútip tur dep oilaimyn. Básekelestik – damýdyń eń jaqsy yntalandyrýshysy, sondyqtan Prezidentke tikelei baǵynatyn jeke básekelestikti qorǵaý jáne damytý agenttigin qurý naryq úshin jaqsy belgi bolady», - deidi ol.
Sonymen qatar, ol Joldaýda qoǵamda burynnan beri qatty synǵa ushyraǵan sátterdiń kórinis tapqanyn, onyń bir mysaly retinde biýdjet esebinen kásibi sport klýbtaryn ustaý ekenin atap ótti. Sonymen birge, buqaralyq sportqa basymdyq berý usynyldy.
«Joldaýda memlekettik apparattyń tiimdiligin arttyrý, ony qysqartý týraly talap ta bar. Bul da qoǵamda kóp talqylanǵan taqyryptardyń biri. Qazirgi ýaqytta damýdyń jalǵyz ǵana joly bar, ol «Ózger nemese ól» qaǵidasy. Menińshe, dál Joldaýda qoiylǵan mindetterdi júieli túrde júzege asyrý sheneýnikterdi baǵalaýǵa tikelei áser etedi», - deidi Aleksandr Danilov.
