Parlament Májilisiniń tóraǵasy Erlan Qoshanov BAQ ókilderiniń Almatydaǵy «Altyn orda bazarynyń» taǵdyry týraly suraqqa bergen jaýabynda elimizde «tiispeýshilik» quqyǵyna ie adam joq ekenin málim etti, dep habarlaidy QazAqparat.
«Eń birinshiden, Almaty oblysynyń ákimi Qanat Bozymbaevtyń Almatydaǵy «Altyn orda» bazary týraly suhbatyn kórgen joqpyn. Altyn orda bazaryna qatysty qazirgi ýaqytta tergeý amaldary júrip jatyr. Menińshe, ádiletti sheshim shyǵady. Kútý kerek. Meniń oiymsha, qazir derbes quqyǵy bar, «tiispeýshilik» quqyǵyna ie eshkim joq. Sol sebepti bazardyń bastyǵy nemese jetekshisi bolsyn, qylmys jasasa, ol tiisti jazasyn alady», - dedi Májilis spikeri.
