Qazaq jazýshylarynyń shyǵarmalaryn, onyń ishinde Beiimbet, Sáken, Iliias, Mirjaqyptardyń shyǵarmasyn shet tiline aýdarý qajet. Bul týraly Halyqaralyq jazýshylar forýmynda Oljas Súleimenov aitty, dep habarlaidy QazAqparat.
Qazaqstannyń halyq jazýshysy Oljas Súleimenovtiń pikirinshe,aǵylshyn tili tek álemdik bailanys, qarym-qatynas tili ǵana emes, jalpy álemdik mádeniet tiline de ainalyp otyr. Iaǵni jazýshyny álemge tanytý aǵylshyn tilinen bastalady degen sóz.
«Qazaqstan óziniń aqyn-jazýshylarmen maqtana alady. Bizde ádebiet salasy jaqsy damyǵan. Jazýshylardyń shyǵarmalaryna oqyrmandar óz baǵasyn berip jatyr. Biz munymen toqtap qalmaýymyz kerek. Qazaq ádebietin álemge tanytyp, moiyndatý kezek kútirmeitin másele», - dedi halyqaralyq jazýshylar forýmynda Oljas Súleimenov.
Oljas Súleimenovtiń aitýynsha, shyǵarmany aýdarý ońai sharýa emes. Oǵan naǵyz mamandy, myqty aýdarmashyny tartý qajet.
«Qazir aýdarmanyń ózi bizneske ainalyp ketti. Memleket qyrýar qarjy bóledi. Tiisti mekeme tender jariialaidy. Utyp alǵan kompaniia aýdarady. Ony kim aýdaryp jatyr, qalai aýdaryp jatyr, maǵynasy qandai, oǵan eshkim bas aýyrtpaidy. Olai bolmaidy. Aýdarmashy óz isiniń mamany bolýy kerek. Ol adam aqyn-jazýshynyń jyldar boiy tókken eńbegin baǵalaýy tiis. Aýdarylǵan shyǵarma túpnusqadan aýytqymaýy kerek. Maǵynasyn joǵaltpaýy tiis. Shet tiline aýdaratyn mamandar arnaiy satylardan, iaǵni baiqaýlardan ótý kerek dep oilaimyn», - dedi Oljas Súleimenov.
Memleket jáne qoǵam qairatkeri, eń aldymen qandai aqyn – jazýshylardyń shyǵarmalary aýdarylýy kerektigin atap ótti.
«Meniń oiymsha eń aldymen kimniń eńbegi aýdarylady sony anyqtap alý qajet. Úsh seriiaǵa bólip tastaýǵa bolady. Birinshiden halyq jaýy dep atylyp ketken azamattarymyzdyń shyǵarmasyn shet tiline aýdartý bizdiń paryzymyz. Beiimbet Mailin, Iliias Jansúgirov, Sáken Seifýllin, Mirjaqyp Dýlatovtardy aityp otyrmyn. Ekinshi kezekte keńes kezindegi jazýshylardyń eńbekteri, sodan keiin táýelsizdik alǵan kezdegi aqyn-jazýshylarymyzdyń shyǵarmasyn usynýymyz kerek», - dep qortyndylady Oljas Súleimenov.
Eske sala ketsek, Almatyda halyqaralyq jazýshylar forýmy ótip jatyr. Oǵan 18 memleketten 81 delegat qatysýda
