Qorǵanys ministri Rýslan Jaqsylyqov kazino oinaǵan áskeri qyzmetshilerge qatysty pikir bildirdi, dep habarlaidy Sputnik Qazaqstan.
Bas prokýratýra jariialaǵan tizimde 95 áskeri qyzmetshi bar. Ministrdiń aitýynsha, qazirgi kezde tizimge ilikken árbir áskeri qyzmetshiniń aty-jóni belgili. Qyzmettik tergeý bastaldy. Sonyń nátijesinde tiisti sheshim qabyldanady.
"Men tergeý qorytyndysy boiynsha olardyń áskeri qyzmetti jalǵastyrýyna qatysty sheshim qabyldaimyn. Biraq aldymen tergeýdiń nátijesi shyqsyn. Bizde bári bar. Qyzmettik tergeý júrgizilip jatyr. Olardyń barlyǵy – orta quramǵa kiretin áskeri qyzmetshiler. Joǵary quram joq, ýaqyty da joq, óitkeni bárimiz ylǵi dalada júremiz", - dedi Jaqsylyqov Cenat kýlýarynda.
Ministrdiń sózine qaraǵanda, kazinoǵa barǵan áskeri qyzmetshiler kóp aqsha utylmaǵan. Olar oiyn-saýyq mekemesine bilmestikten barýy múmkin. Qorǵanys ministrligi aldaǵy ýaqytta áskeri qyzmetshiler arasynda otbasylyq biýdjetti josparlaý jáne júrgizý boiynsha oqytý kýrstaryn ótkizýdi josparlap otyr.
Eske salaiyq, buǵan deiin Almaty oblysynyń prokýratýrasy tekserý júrgizip, 305 qazaqstandyq sheneýnik oiynhanada 507 million teńge jumsaǵanyn anyqtady. Tekserý qorytyndysy quzyrly organdarǵa tapsyrylǵan bolatyn.
Anyqtalǵan memlekettik qyzmetshiler arasynda:
Ishki ister ministrligi - 97;
Qorǵanys ministrligi - 95;
Qarjy ministrligi - 25;
Joǵarǵy Sot - 7;
Qarjy monitoringi organdary - 15;
Sybailas jemqorlyqqa qarsy is-qimyl organdary - 3;
ákimdikter - 36;
basqa da memlekettik organdar - 27.
