Aqtaýda «QazAzot» kásipornyndaǵy kúrdeli mineraldy tyńaitqyshtar óndirý tsehynyń shatyry ortasyna opyrylyp qulady. Bul týraly kásiporynnyń baspasóz qyzmetinen málim etti, dep habarlaidy QazAqparat.
«Oqiǵa 24 shilde kúni saǵat 05:20 shamasynda boldy. Ǵimarat shatyrynyń ishinara opyrylýy qolaisyz meteojaǵdailar saldarynan oryn alǵan. Óitkeni sońǵy eki aptada óńirde anomaldy temperatýra boldy. Sondai-aq oqiǵa bolǵan kúni naizaǵai oinap, nóser jaýyn jaýǵan edi.
Tehnologiialyq jabdyqtar zardap shekken joq. Oqiǵa ornyn «Jalyn» Órt sóndirýshi» JShS-nyń avariialyq-qutqarý qyzmeti tekserdi. Aimaq qorshaldy. Kásiporyn qyzmetkerleri men halyqtyń densaýlyǵyna qaýip joq», - delingen aqparatta.
Oqiǵa oryn alǵan aimaq tolyqtai qorshalǵan. Qaza tapqandar men zardap shekkender joq.
