Jol sapasyna qatysty turǵyndardyń shaǵymynan keiin «QazAvtoJol» UK» AQ Túrkistan oblystyq filialynyń direktory jumysynan bosatyldy. Bul týraly QR Indýstriia jáne infraqurylymdyq damý ministrligi Avtomobil joldary komitetinen málim etti, dep habarlaidy QazAqparat.
«El turǵyndarynan bolǵan synǵa bailanysty «QazAvtoJol» UK» AQ Túrkistan oblystyq filialynyń direktoryn qyzmetinen bosatý týraly sheshim qabyldandy. Qoǵam tóraǵasynyń orynbasaryna qatań sógis jariialandy.
Sonymen qatar joldardy kútip ustaý sapasyn tiisinshe baqylamaǵany úshin «Jol aktivteriniń ulttyq sapa ortalyǵy» sharýashylyq júrgizý quqyǵyndaǵy» respýblikalyq memlekettik kásipornynyń óńirlik filial basshysyna qatysty tártiptik sipattaǵy sharalar qabyldandy», - delingen usynylǵan habarlamada.
Málim etilgendei, qazirgi ýaqytta beton plitalarynyń kóterilýin toqtatý boiynsha sharalar qabyldandy. Sondai-aq mikrosiýrfeising tóseý jumystaryn ýaqytsha toqtatý sheshimi qabyldandy. Budan bólek, tsement-beton plitalarynyń arasyn keńeitetin temperatýralyq tigister kúndelikti tekseriletin boldy.
«Aita ketý kerek, atalǵan másele QR IIDM Avtomobil joldary komitetiniń erekshe baqylaýynda. Plitalardyń ózgergen oryndarynda taldaý júrgizildi. Sonyń negizinde tiisti buiryqtar berildi. Bul is-sharalardyń basty maqsaty – mundai faktilerdiń qaitalanýyna jol bermeý», - delingen ministrliktiń baspasóz málimetinde.
Eske salaiyq, biylǵy 8 maýsymda «Samara – Shymkent» tasjolynyń «Qyzylorda – Shymkent» aqyly ýchaskesinde tsement-beton plitasy kóterilip ketken bolatyn. Jol ortasyndaǵy úlken plitalar ajyrap, kólikterdiń júrýine kedergi týdyrdy.
Keiin, respýblikalyq mańyzy bar M-32 «Samara-Shymkent» avtojolynyń Túrkistan qalasy Temirlan aýdany mańyndaǵy bóliginde tsement-beton plitasy taǵy kóterildi.
