Memleket basshysy Nursultan Nazarbaev «QazAvtoJol» ulttyq kompaniiasynyń jumysyn synǵa aldy, dep xabarlaidy QazAqparat tilshisi.
«Quqyq qorǵaý organdary «QazAvtoJoldyń» barlyq derlik basshylyǵyn qamaýǵa aldy. Ishinde aimaqtyq filialdardyń jetekshileri de bar. Árine, bul jaqsylyqtyń nyshany emes. Osynyń ózi qarjyny tiimdi igerý jáne jol sapasy boiynsha úlken kemshilikterdiń bar ekenin kórsetip otyr. Jeńis Qasymbek (Investitsiialar jáne damý ministri - avt.) qaida qarady? Ne boldy? «QazAvtoJoldyń» bári ury bolyp shyqty ma?», - dep surady N.Nazarbaev búgin Úkimettiń keńeitilgen otyrysynda.
Ministr Jeńis Qasymbek «QazAvtoJol» ulttyq kompaniiasy boiynsha sybailas jemqorlyqqa qatysty qylmystyq isterdiń qozǵalǵanyn jetkizdi. Osy oraida, Prezident normativterdi ózgertý qajettiligine toqtaldy.
«Jumysty oryndaǵanda biz normativke qaraimyz. Qazirgi normativ eskirdi. Joldyń sapasyna basa nazar aýdarý qajet. Áitpese, normativpen salady, normativpen aqsha alady. Memlekette aqsha kóbeise, tábetteri de ashylady. Ministrlik ne úshin kerek? Memlekettik qarjynyń jumsalýyn qadaǵalaýy qajet. Bul - seniń (Jeńis Qasymbektiń - avt.) jumysyńdaǵy kemshilik», - dep atap kórsetti N.Nazarbaev.
Aita keteiik, sońǵy úsh jylda avtomobil joldaryn qurylysyna biýdjetten 630 mlrd teńge bólindi.
