Foto uralskweek.kz saitynan
Batys Qazaqstan oblysyndaǵy Podstepnoe-Fedorovka-Resei Federatsiiasynyń shekarasy ýchaskesindegi Aqsai tasjoly túpkilikti retke keltirilmek. Bul jańalyq jurtshylyqty qýantty, biraq sonymen birge bul joba nege sonsha qymbat dep alańdaýly. "QazAvtoJol" UK mundai aqsha nelikten qajet ekenin túsindirdi, - dep habarlaidy Tengrinews.kz tilshisi "Ýralskaia nedelia" basylymyna silteme jasap.
Birneshe kún buryn "Podstepnoe-Fedorovka-RF shekarasy" tasjolynyń 36 shaqyrymyn qaita jańartýǵa memlekettik tapsyrys ótkizý týraly habarlandyrýdy "QazAvtoJol" UK Batys Qazaqstan filialy jariialaǵan bolatyn. Jobanyń quny - 20,4 milliard teńge, áleýetti merdigerlerden ótinim qabyldaý jalǵasyp jatyr.
Qoǵam jobanyń qymbattyǵyna narazy, áleýmettik jelilerde adamdar mundai aqshaǵa jol ýchaskesin qaita quryp qana qoimai, nólden bastap avtomobil jolyn (beton qorshaýy bar) salýǵa bolady degen pikir bildirdi.
"QazAvtoJol" UK baspasóz qyzmetiniń málimetinshe, qaita qurý jobasy boiynsha jalpy uzyndyǵy 144 km trassany qaita jańartýdy bastaý úshin barlyq qajetti daiyndyq rásimderi júrgizildi.
"Atalǵan ýchaskeniń qunyna: qoldanystaǵy joldy tolyq bólshekteý, jańa 100 sý ótkizý qubyryn salý, 5 kópirdi qaita jańartý, 2 jańa kólik aiyrymyn, 14 mal aidaý orny, 4 demalys alańyn salý jáne jol tóseminiń jańa konstrýktivti qabattaryn salý arqyly joldy qaita jańartý kiredi. Sonymen qatar, qurylys qunyna jalpy Batys Qazaqstan oblysy boiynsha tas karerleriniń joqtyǵy da áser etedi. Tiisinshe, jol-qurylys materialdarynyń barlyq kólemi syrttan ákelinedi. Esterińizge sala keteiik, materialdar kórshiles Aqtóbe oblysynan jetkiziledi", - dep túsindirdi "QazAvtoJol" UK baspasóz qyzmeti.
Vedomstvo qaita jańartýdan keiin tasjol III-ten II tehnikalyq sanatqa aýysatynyn atap ótti. Jobanyń jobalyq-smetalyq qujattamasy "Memsaraptama" RMK-men bekitilgen. Joldaǵy jumystar biyl bastalyp, 2025 jyly aiaqtalady.
