Óskemen qalasynda «Qazatomónerkásip» kompaniiasy, «Úlbi metallýrgiialyq zaýyty» AQ jáne Shyǵys Qazaqstan oblysynyń ákimdigi arasyndaǵy yntymaqtastyq týraly memorandýmǵa qol qoiyldy, dep habarlaidy «Qazatomónerkásip» UAK» AQ baspasóz qyzmeti.
Memorandýmǵa ekonomika men áleýmettik salany odan ári damytýǵa, turǵyndardyń ál-aýqatyn arttyrýǵa baǵyttalǵan aimaqty áleýmettik-ekonomikalyq damytý salasyndaǵy taraptardyń yntymaqtastyǵy arqaý bolǵan.
Memorandýmǵa qol qoiý rásimine «Qazatomónerkásip» UAK» AQ basqarma tóraǵasy Asqar Jumaǵaliev pen Shyǵys Qazaqstan oblysynyń ákimi Danial Ahmetov qatysty.
Qujatqa sáikes, ÚMZ óńirdi áleýmettik-ekonomikalyq damytý is-sharalaryna belsendi qatysatyn bolady. Osy maqsatta zaýyt 2017-2019 jyldary oblys biýdjetine 3 mlrd teńge aýdarady, oǵan qosa, investitsiialyq jobalar sheńberinde jańa jumys oryndaryn ashady.
Qazatomónerkásiptiń enshiles kásiporny sanalatyn Úlbi metallýrgiialyq zaýyty qazirgi kezde Shyǵys Qazaqstan oblysynda birqatar investitsiialyq jobalardy ise asyryp keledi. Solardyń qatarynda jylyna atom reaktorlaryna arnalǵan 200 tonna jylý bólgish quramalar shyǵaratyn qýatqa ie óndiris te bar.
Memorandým sheńberinde ákimdik Úlbi metallýrgiialyq zaýyty qyzmetkerlerin kásibi daiyndaý, qaita daiyndaýdan ótkizý jáne olardyń biliktiligin arttyrýdy uiymdastyrýǵa yqpal jasamaq.
Sol kúni «Qazatomónerkásip» kompaniiasy men D. Serikbaev atyndaǵy Shyǵys Qazaqstan memlekettik tehnikalyq ýniversiteti arasyndaǵy ǵylymi-tehnikalyq yntymaqtastyq týraly kelisimge qol qoiyldy.
Kompaniia basshysy Asqar Jumaǵaliev pen ýniversitet rektory Jasulan Sháimerdenov atom salasy jáne balama energetikadaǵy irgeli jáne qoldanbaly zertteýler, óndiristi ártaraptandyrý maqsatynda sirek jáne sirek jer metaldar alý jáne óńdeý, ulttyq atom kompaniiasy úshin kadrlar daiarlaý salasyndaǵy birlese atqarar jumystardy kelisip aldy.
