Foto: pexels.com
1 qazannan bastap jylytý maýsymy Abai, Aqtóbe jáne Qaraǵandy oblystarynda bastalady dep josparlanǵan, dep habarlaidy Ult.kz Energetika ministrligine silteme jasap.
Aita keteiik, Shyǵys Qazaqstan, Pavlodar, Aqmola oblystary men Astana qalasynda jylý berý maýsymy bastalyp ketti.
"Qazaqstannyń Biryńǵai elektr energetikalyq júiesi Resei Federatsiiasynyń jáne Ortalyq Aziia elderiniń energetikalyq júielerimen qatarlas jumysyn jalǵastyra otyryp, qalypty rejimde jumys isteidi.
2024 jylǵa bekitilgen jóndeý kestesi aiasynda 10 energoblokta, 55 qazandyqta jáne 45 týrbinada kúrdeli jumystar josparlanǵan. Qazirgi tańda 4 energoblokta, 22 qazandyqta jáne 16 týrbinada jóndeý jumystary júrgizilse, 5 energobloktyń, 32 qazandyqtyń jáne 28 týrbinanyń jóndeý jumystary aiaqtaldy", - delingen ministrlik habarynda.
Vedomstvodaǵylardyń aitýynsha, barlyq elektr stantsiiasy jylytý maýsymynyń bastalýyna daiyn, negizgi jabdyqtarmen, sonyń ishinde qazandyqtarmen jáne týrbinalarmen qamtamasyz etilgen. 2024 jyly AEK-tiń (elektr jelilerin taratý kompaniialarynyń) elektr jelilerinde 20,8 myń km elektr berý jelilerin, 422 qosalqy stantsiiany jáne 4054 taratý pýnktteri men transformatorlyq qosalqy stantsiialardy jóndeý kózdelgen. Qazirdiń ózinde 19,9 myń km elektr jelileri, 376 qosalqy stantsiia jáne 4046 taratý pýnkti men transformatorlyq qosalqy stantsiialar jóndeldi.
Jylýmen qamtý salasynda 2024 jyly 546 km jylý jelilerin kúrdeli jóndeý jáne jańǵyrtý josparlanǵan. Qazirgi ýaqytta 516,3 km jylý jelileri jóndeldi, bul jyldyq jospardyń 94,6% úlesine teń.
"Energiia kózderiniń qoimalaryndaǵy otyn qory 5,2 mln tonna kómir men 89 myń tonna mazýt, bul jylytý maýsymynyń turaqty ótýin qamtamasyz etýge múmkindik beredi", - deidi ministrlik ókilderi.
QR Energetika ministrliginiń Atomdyq jáne energetikalyq qadaǵalaý jáne baqylaý komiteti energiia óndirýshi jáne energiia berýshi uiymdardyń, QR Ónerkásip jáne qurylys ministrliginiń, jergilikti atqarýshy organdardyń jáne "Qazaqstan Temir Joly" UK" AQ-nyń qatysýymen turaqty selektorlyq keńester ótkiziledi.
2024 jylǵy 11 qyrkúiekte kezekti keńes ótkizildi, onyń qorytyndysy boiynsha jóndeý jumystaryn ýaqytyly aiaqtaý, otynnyń normativtik qoryn saqtaý jáne energetikalyq jabdyqtardy paidalanýdy baqylaýdy kúsheitý jóninde tapsyrmalar berilgeni atap ótilgen.
