Qyzylorda oblysy Qazaly aýdanynyń ortalyǵy Áiteke bi kentinde Áiteke bige arnalǵan eskertkish ashyldy, dep habarlaidy "Ult aqparat".
Sharaǵa Qyzylorda oblysynyń ákimi Qyrymbek Kósherbaev qatysty.
«Respýblika kóleminde Áiteke bidiń esimin este qaldyrý baǵytynda biraz jumystar atqaryldy. Onyń atynda aýdan, kósheler, aýyldar bar. Osy aýdannyń ortalyǵy da Áiteke bidiń esimimen atalady. Ótken jyly babamyzdyń eńseli eskertkishin ornatý týraly sheshim qabyldaǵan edik. Búgin, mine, eskertkish te óz tuǵyryna qondy. Elbasy óziniń «Rýhani jańǵyrý» baǵdarlamalyq maqalasynda «Patriotizm eń aldymen týǵan jerge, óz aýylyna, qalasyna, óńirine jáne kishi otanyna degen súiispenshilikten bastaý alady» degen bolatyn. Al, qazaqstandyq patriotizmdi qalyptastyryp, ilgeri damytý ultymyzdyń uly adamdarynyń úlgi-ónegesin urpaqqa dáripteý arqyly júzege aspaq. Olai bolsa, Áiteke bidei ulylardy ulyqtaý - búgingi urpaqtyń azamattyq paryzy», - dedi oblys ákimi Qyrymbek Kósherbaev.
Eskertkishtiń ashylýyna arnaiy Ózbekstan Respýblikasynyń Naýai oblysyndaǵy Áiteke bi kesenesinen topyraq ákelinip qoiyldy.
Sondai-aq, aýyl turǵyndaryn tarih ǵylymdarynyń doktory, etnolog Ahmet Toqtabai jáne aýdandyq ardagerler keńesiniń tóraǵasy Orazǵali Bekbanov quttyqtady.
