Asharshylyq jyldary 5 200 000 qazaqtan aiyryldyq. «Egemen Qazaqstan» basylymynyń uiymdastyrýymen 31 mamyr – Qýǵyn-súrgin jáne asharlyq qurbandaryn eske alý kúnine arnalǵan «Ǵasyr zulmaty» taqyrybynda ótken onlain dóngelek ústelde jazýshy Smaǵul Elýbai osylai aitty, dep habarlaidy QazAqparat.
«Álemniń qozǵaýshy kúshteri álsizderdi basyp alýǵa kiristi, nátijesinde birinshi dúniejúzilik soǵys, odan keiin ekinshi dúniejúzilik soǵys boldy. Iaǵni, adamdardy qyrýǵa teoriialyq negizder jasaldy. Eń kedei qazaqtyń ózinde 50 bas qoiy, 4-5 iri qarasy bolatyn. Bul Reseiden kelgen Goloshekinniń kózimen qaraǵanda qazaq halqy qyrylýy kerek edi. 1992 jylǵy komissiia quramynda Talas Ómirbek boldy. Ol komissiia 1931-1932 jyldardaǵy asharshylyqtan 2 300 000 qazaq qyrylǵanyn aitty. Sonda Turar Rysqulov 1918-1919 jyly 1 214 000 adam qyryldy dese, Muhtar Áýezov 1921 jylǵy asharshylyqta 1 700 000 qazaq qyryldy dedi. Ekeýin qossaq, 3 millionǵa jýyqtaidy. Buǵan 2 300 000-dy qossaq, on shaqty jyl ishinde 5 200 000 qazaqtan aiyryldyq», - deidi Smaǵul Elýbai.
Onyń aitýynsha, zamanaýi tarihta teń jartysynan aiyrylǵan qazaqtyń tragediiasyndai tragediia bolǵan emes.
«Naqty derekpen sóilegende jaǵdai osyndai. Biz 10-15 jyl ishinde 5 200 000 qazaqtan aiyryldyq. «Munsha qazaq qaidan paida boldy?» degen suraq týyndasa, qolymyzda Orynbordaǵy tarih institýtyn basqarǵan Aleksandr Chýloshnikovtyń kitaby bar. Onda qazaqtyń sany revoliýtsiiaǵa deiin 8 million bolǵandyǵy týraly aqparat bar», - deidi ol.
