Qazaqtyń asa kórnekti aqyny, Qazaqstannyń Halyq jazýshysy, Abai atyndaǵy Memlekettik syilyqtyń iegeri Muzafar Álimbaev 95 jasqa qaraǵan shaǵynda ómirden ozdy, dep habarlaidy "Ult aqparat".
Muzafar Álimbaev 1923 jyly 29 qazanda Pavlodar oblysy Sharbaqty aýdanyndaǵy Maraldy aýylynda dúniege kelgen. QazMÝ-di támamdaǵan. Tyrnaqaldy óleńi on bes jasynda Pavlodar oblystyq «Qyzyl tý» gazetinde jaryq kórgen. Soǵys jyldarynda respýblikalyq, oblystyq jáne maidandyq gazetterde basylyp turdy.
1948 jyly Armiiadan oralǵan soń, «Pioner» jýrnalynda poeziia bólimin basqarady. 1956-1958 jyldary «Qazaq ádebieti» gazetinde bólim meńgerýshisi, Bas redaktordyń orynbasary. 1958 jyly «Baldyrǵan» jýrnaly ashylǵan kúnnen 1986 jylǵa deiin jýrnaldyń Bas redaktory boldy.
Alǵashqy kitaby - «Qaraǵandy jyrlary» 1952 jyly basylyp shyqty. Sodan beri birneshe ondaǵan kitaby, birneshe dúrkin tańdamalylary, týysqan halyqtar tilinde kóptegen jinaǵy shyqty.
Júz seksen ánge óleń jazdy. 64 tól týma jáne aýdarma kitaptardyń avtory.
Shyǵarmalary 20 tilge aýdarylǵan. Sonyń ishinde orys tilinde 6 kitaby, túrikmen tilinde «Men - túrik meimany» (1963), qyrǵyz tilinde «Joldar. Oilar. Jyrlar» (1966) jinaqtary jaryq kórgen.
Kórkem aýdarma salasynda Saǵdidyń «Bostanyn» («Jánnat» degen atpen), Petefi men Toqtaǵuldyń, Apollinerdiń tańdamaly óleńder jinaqtaryn, Iu.Fýchiktiń «Dar aldyndaǵy sózin», Orbelianidiń «Ǵibratnamasyn» jáne Pýshkin, Lermontov, Maiakovskii, Ǵ.Toqai, M.Jálil, Firdoýsi, H.Álimjannyń óleń-jyrlaryn qazaq tiline aýdarǵan.
1982 jyly «Aspandaǵy ápke» jinaǵy úshin respýblikalyq Abai atyndaǵy Memlekettik syilyǵyna ie boldy.
QR eńbek sińirgen mádeniet qyzmetkeri (1978), Qazaqstannyń Halyq jazýshysy, Jambyl atyndaǵy Halyqaralyq syilyqtyń iegeri (1996). Qazaqstan Respýblikasynyń eski Ánurany avtorlarynyń biri.
Otan soǵysynyń birinshi jáne ekinshi dárejeli ordenderimen, Qazaq SSR Joǵarǵy Keńesiniń Qurmet gramotasymen, «Otan» ordenimen marapattalǵan.
Shyǵarmalary: Qaraǵandy jyrlary. Óleńder. A., QMKÁB, 1953; Jumbaqtar. Óleńder. A., QMKÁB, 1954; Lirika. Óleńder. A., QMKÁB, 1958; Alataý baýraiynda. Óleńder men poemalar. A., QMKÁB, 1960; Meniń Qazaqstanym. Poema. A., QMKÁB, 1960; Tańdamalylar. Óleńder men poemalar. A., QMKÁB, 1961; Shynyqsań, shymyr bolasyń. A., QMKÁB, 1962; Joldar – jyrlar. Óleńder men poemalar. A., QMKÁB, 1964; Júrek lúpili. Óleńder men poemalar. A., «Jazýshy», 1967; Órnekti sóz – ortaq qazyna. Monografiia. A., «Qazaqstan», 1967; Kóńil kúni. Tańdamaly. Óleńder men dastandar. A., 1972; Baldáýren shirkin, balalyq. Tańdamaly. Óleńder men poemalar. A., «Jazýshy», 1973; Tárbie týraly áńgimeler. Esse. A., «Qazaqstan», 1972; Er eńbegi – ainasy. Maqaldar men naqyldar. A., «Qainar», 1968; Qalam qairaty. Zertteýler, esse. A., «Jazýshy», 1976; Kóńil kúndeliginen. Esse. A., «Jalyn», 1980; Marjan sóz. Maqaldar. A., «Jazýshy», 1982; Tańdamaly. 2 tomdyq. Óleńder, poemalar, ańyzdar. A., «Jazýshy», 1983; Aqmańdailym. Ánóleńder. A., «Óner», 1984 ; Aiannyń alaqany. Óleńder. A., 1987; Súimegen júrek semedi. Óleńder. A., 1987; Ómir. Óner. Ónerpaz. Esse. Zertteme. A., 1990; Eki taqtai bir kópir. Óleńder. A., 1996; Shyǵarmalar jinaǵy. Eki tomdyq. 1997; Naqyldar kitaby. 2000; Aýlaq bol jaman ádetten. A., «Balaýsa», 2002; Hat. Óleńder, poemalar, balladalar. 2005; Naqylnama. Tól aforizmderiniń kitaby. 2006; Kóp tomdyq shyǵarmalar jinaǵy. (7 tom). 2007; Baldáýren. Balalarǵa arnalǵan tańdaýly taqpaqtar, dastandar, jumbaq, jańyltpashtar. 2008.
