QR Tsifrlyq damý, innovatsiialar jəne aeroǵarysh ónerkəsibi ministri Baǵdat Mýsin Májilistiń baspasóz alańynda BAQ ókilderiniń saýaldaryna jaýap bere otyryp, «Qazaqtelekom» men «Transtelekom» kompaniialary shaǵyn operatorlardyń jumysyn qalai qiyndatqanyn aityp berdi, dep habarlaidy QazAqparat.
«Qazir monopoliiasyzdandyrý boiynsha jumys júrgizip jatyrmyz. Biz aýyldyq eldi mekenderde shaǵyn operatorlardyń paida bolǵanyn quptaimyz, yntalandyryp jatyrmyz. Mysaly 1000 turǵyny bar aýyldyń ishine biznesmen kelip, jelilerdi baǵana arqyly árbir úige taratyp, aqsha taba alady. Biraq ol qyzmetti halyqqa usyný úshin shaǵyn operator «Qazaqtelekom» álde «Transtelekomnyń» jelilerine qosylý problemasyna tap bolady. Iaǵni, ol – monopoliia. Basqalardyń eldi meken ishine internet taratýyna múmkindik bermeidi, ózi de taratpaidy», - degen ministr.
Sondai-aq, ol bul baǵytta Básekelestikti damytý jáne qorǵaý agenttigimen birge jumys istep jatqanyn atap ótti.
«Qazir monopolister jaǵdaidy paidalana otyryp, shaǵyn operatorlarǵa 50/50 qaǵidaty boiynsha jumys isteýdi usynady. Iaǵni, biznesmen jelini óz kúshimen tartyp, halyqpen jumys isteýi kerek. Sodan túsken tabysynyń 50 paiyzyn monopoliske berýi shart. Osy máseleni biz monopoliiasyzdandyrý komissiiasynda kóterdik. Qazir Básekelestikti damytý jáne qorǵaý agenttigimen birlesip, zańǵa ózgerister engizý boiynsha jumys istep jatyrmyz», - dedi Baǵdat Mýsin.
Vedomstvo basshysynyń aitýynsha, qazir atalǵan monopolister aýyldarda tek memlekettik mekemelerge ǵana internet tartyp otyr.
Onyń ózinde bul jumys memleket biýdjetiniń esebinen júzege asady.
«Turǵyn sany 250-den asatyn aýyldy mekenderdiń 1200-ine symdy jelide optika jetkizildi. Biraq optikanyń aýyldy meken ishinde taratylýy problema bolyp tur. Óitkeni «Qazaqtelekom» men «Transtelekom» 2018 jyly jasalǵan kelisimshart boiynsha tek qana mektep, ákimdik siiaqty úsh mekemege ǵana internet jetkizdi. Al eldi mekenniń ishinde taratýǵa ekonomikalyq turǵydan negiz joq deidi. Biz olarǵa biýdjet qarajatyn memlekettik mekemelerge ǵana bóldik. Sol qarajat olarǵa jetkilikti bolyp tur. Sondyqtan osyndai máselege tap boldyq», - dedi ministr.
