Qazaqtelekom katarlyq Power International Holding (PIH) kompaniiasyna «Mobail Telekom-Servis» JShS (MT-S) qatysý úlesiniń 100% satý mámilesin aiaqtady. Esterińizge sala keteiik, byltyr aqpanda Dohada Qazaqtelekom, PIH jáne «Samuryq-Qazyna» qory arasynda bastapqy kelisim, al maýsym aiynda uialy bailanys operatoryn satý týraly túpkilikti kelisim jasalǵan bolatyn.
Aita keteiik, Altel jáne Tele2 brendterimen tanymal «MT-S» Qazaqstandaǵy joǵary jyldamdyqty 5G bailanys jelisiniń jetekshi provaideri bolyp tabylady. 2004 jyly qurylǵan kompaniiada 2000-ǵa jýyq qyzmetker jumys isteidi jáne 140-tan astam bólshek saýda dúkenderin basqarady. Operator Qazaqstannyń telekom-sektorynda sheshýshi pozitsiiany ielene otyryp, telekommýnikatsiialyq jáne tsifrlyq qyzmetterdiń keń spektrin usynady.
«Bul mámile «MT-S» strategiialyq damýynyń mańyzdy kezeńi bolyp tabylady jáne kompaniia aldynda odan ári ósý jáne qosymsha qundylyq jasaý úshin múmkindikter ashady. Power International Holding siiaqty bedeldi halyqaralyq strategiialyq investor innovatsiialardy, qyzmet kórsetýdiń joǵary standarttaryn engizbek, básekelestikti kúsheitip, jańa baǵdarlardy belgilei otyryp, «MT-S» ǵana emes, Qazaqstannyń búkil uialy telekommýnikatsiia salasynyń odan ári damýy men órkendeýi úshin bar kúshin salatynyna senimdimin. Men «MT-S» komandasynyń Qazaqtelekom quramynda atqarǵan jumysyn maqtan tutamyn jáne Qazaqstannyń tsifrlyq transformatsiiasyn qoldai otyryp, kompaniianyń pozitsiiasyn odan ári nyǵaitý úshin estafetany PIN-ke qýana tabystaimyn», - dep atap ótti «Qazaqtelekom» AQ Basqarma tóraǵasy Baǵdat Mýsin.
20,2 million halqy, qamtý kólemi joǵary uialy jáne internet bailanysy bar Qazaqstannyń telekommýnikatsiia salasy turaqty ósim kórsetip otyr. Ony tutynýshylardyń úzdik bailanys qyzmetteri men tsifrlyq tehnologiialarǵa degen suranysynyń artýynan baiqaýǵa bolady.
«Bul satyp alý Qazaqstandaǵy keńeitý strategiiamyzdyń bir bóligi bolyp tabylady. Biz eldegi tsifrlyq tájiribeni jaqsartatyn innovatsiialyq sheshimderdi usyna otyryp, telekommýnikatsiia jáne tehnologiia sektorlaryn damytýǵa eleýli úles qosýǵa niettimiz», - dedi PIN tóraǵasy Mýtaz Ál Haiiat.
«Power International Holding telekommýnikatsiialyq klasteri bizdiń ósý strategiiamyzdyń mańyzdy bóligi bolyp tabylady. Satyp alý, tehnologiialyq investitsiialar jáne tutynýshylardyń qajettilikterin qanaǵattandyrý arqyly PIH óziniń barlyq sektorlarynda turaqty qundylyq qurýdy jalǵastyrýda», - dedi PIH Prezidenti Ramez Al Haiiat.
«MT-S» kompaniiasyn satyp alý tehnologiiany qoldana otyryp, qaýymdastyqtardyń múmkindikterin keńeitýge baǵyttalǵan PIH kózqarasyna sáikes keledi. Jelilik infraqurylym, derekterdi taldaý jáne tsifrlyq tólem júieleri salasyndaǵy óz tájiribesine súiene otyryp, PIH tutynýshylardyń kóńilin taýyp, búkil Qazaqstan boiynsha tehnologiialyq innovatsiialardy yntalandyrýǵa umtylady.
