Astana aialdamasynda "qazaqtardy itshe qyrý kerek" degen arandatýshylyq sóz jazǵan er adam málimdeme jasady, - dep habarlaidy kaz.tengrinews.kz tilshisi.
2004 jyldan beri Qazaqstanda júrgen 47 jastaǵy Ózbekstan azamaty QR QK-niń 174-baby boiynsha aiyptalyp otyr. Bul iske qatysty sot otyrysy Astananyń Saryarqa aýdandyq №2 sotynda qaralyp jatyr.
Er adam sot zalynda turyp, mundai jazba qaldyrýǵa neniń itermelegenin túsindirdi.
"Meniń júregim nashar. Sonymen qosa, ishimdikti qoia almai júrmin. Biraq ol kúni urttaǵanym da joq. Velosipedpen ketip bara jatqanymda meni eki jigit toqtatty. Temeki surady, aýzyna kelgenderin aityp, aqsha talap etti. Bireýi meni uryp jiberdi, velosipedimdi tartyp almaq boldy. Osydan keiin qanym basyma shaýyp, ashýym keldi. Jerde jatqan markerdi kórdim. Aialdama tur eken. Ashýmen osyndai sózder jazyp qoiyppyn. Sosyn ketip qaldym, al 7 kúnnen keiin meni ustady", - deidi aiyptalýshy.
Er adam sózdi ashýmen jazǵandyqtan eshqandai aramdyq oilamaǵanyn aitady. "Qolym ózdiginen júgirip ketti, qabyrǵany syzyp júrgen oqýshynyń qylyǵyndai", - deidi sottalýshy BAQ ókilderi arqyly barsha qazaqstandyqtarǵa.
"Mundai bolady dep oilaǵam joq. Men Qazaqstannyń barsha halqynan resmi túrde keshirim suraýǵa daiynmyn. 2004 jyldan beri Qazaqstandamyn. Sol kóshede turamyn. Kran basqaratynmyn, mamandyǵym sol. Osyndaǵy kóptegen qurylystarda eńbek ettim. Sońǵy eki jyl jumys istei almadym. Júregim aýyrady, emdelýge aqsham joq. Ol aýyrǵan kezde ishimdik ishemin. Osy ishimdik oiymdy tumshalady", - deidi er adam.
"Qymbattylarym meniń qazaqstandyqtarǵa, qazaqtarǵa esh ókpem joq. Olar maǵan únemi qol ushyn beretin. Solardyń arqasynda aman qaldym dese de bolady. Ózbekstanda jumys bolmaǵan soń osynda keldim. Munda adamdar sońǵy nanymen bólisetin. Shyn júregimmen aitamyn: meniń esh ókpem joq", - deidi 47 jastaǵy er adam.
