Foto: dialog.ua/opinion
Ýkrainanyń saiasi jáne áskeri sarapshysy Aleksei Arestovich Qazaqstan armiiasy jóninde pikirin bildirdi, dep habarlaidy Ulysmedia.kz portaly Armanjan Baitasovtyń youtube-arnasyna silteme jasap.
«Resei Ýkrainaǵa basyp kirgennen keiin Qazaqstan armiiasy degen ne degen suraqty óz-ózimizge jii qoia bastadyq. Áskeri sarapshylardy da jii sózge tartyp jatyrmyz. Shynymdy aitsam, bizdiń armiianyń jaǵdaiy oilandyrady. Sizderde de solai bolǵan shyǵar. Toqsanynshy jyldary Ýkraina armiiasy sovet armiiasynyń qaldyǵy sekildi kóringen bolar. Al bizde áli kúnge deiin solai. Bul qanshalyqty qaýipti? Resei qarýyna táýeldiliktiń qandai qaýpi bar» - dep suraidy Baitasov Arestovichten.
Bul suraqqa bergen jaýabyn Arestovich «óte qaýipti» dep bastady. Onyń sózinshe, kez kelgen armiianyń negizgi fýnktsiiasy – soǵysýdan buryn soǵysqa jol bermeý. Bul – basty tapsyrma.
«Eger armiia soǵystyń aldyn ala almasa, iaǵni ol institýt retinde, tutas memleket bolyp eń basty mindetti oryndai almady degen sóz. Qaǵidat óte qarapaiym – qarýly kúshter óte qýatty bolýy kerektigi sonshalyq, qarsylas sizderge basyp kirýdi oilai almaityndai bolǵany abzal», - deidi ol.
Saiasattanýshynyń aitýyna qaraǵanda, Qazaqstan týyndap turǵan qaýipterdi tanýy tiis.
«Eger biz qarsylas retinde Resei armiiasyn kórsek, ol jerde Qazaqstan tarapy Reseige ol soǵys múlde tiimsiz bolatyndai kásibi stsenariidi qalyptastyrýy kerek. Qazaq armiiasy 110 myń, 150 myń adamǵa deiin bolýy kerek. Sol kezde ǵana Resei áskeri jolmen óz maqsatyna jete almaidy. Óitkeni Qazaqstannyń aýmaǵy úlken, qarýlandyryp, jabdyqtaý ońaiǵa túspeidi. Áskeri sarapshylar, qazaqtyń mamandary muny biledi. Álemnen sarapshylardy shaqyrsańyz da, olar óz saraptamasyn jasai alady», - deidi ol.
Arestovichtiń sózinshe, qazir Qazaqstan armiiasynyń sany jetkilikti emes. Ol sonymen qatar aviatsiialyq áleýet qajet ekenin, áýe shabýylyna qarsy qorǵanys kúshi de bolýy kerektigin eskertedi.
«Osynyń bári qazaq armiiasynda bar ma? Menińshe joq. Meniń ákem joǵary laýazymdy ofitser boldy. Men odan «soǵys kezinde qandai ulttar erekshe batyldyq tanytty?» dep suraityn edim. Ol sol kezde «qazaqtar áskeri salada eń myqtylardyń biri» deitin. Iaǵni adam áleýeti, ulttyq minez jaǵynan qazaq armiiasynyń deńgeii óte joǵary. Biraq bul jerde tehnikalyq másele bar. «Volokolamskoe shosse» kitabyn bárimiz bilemiz. Máskeýge qaýip tóngen kezde áigili Baýyrjan Momyshulynyń erligi qanshalyqty hrestomatiialyq deńgeige jetkenin bilemiz. Ekinshi dúnijúzilik soǵysty, qyzyl áskerdi biletinderdiń bári bul tulǵa qolbasshylyqtyń fenomenaldy deńgeiin kórsetkenin jaqsy biledi. Bul qazaqtardyń áskeriler retinde qanshalyqty myqty ekenin kórsetedi», - deidi ol.
Saiasattanýshy «bul jerde sizderdiń bilikterińiz, memleketterińiz sheshedi, sizderge armiia kerek pe degen suraqty men olarǵa Qazaqstan azamaty bolsam qoiar edim» dep suraqpen aiaqtaidy sózin ol.
