Ózbekstanda ótetin aldaǵy kókpardan álem chempionatynda qazandyqtyń ornyna sheńber paidalanylatyn bolsa, Qyrǵyzstan quramasy oǵan qatysýdan bas tartady, dep málimdedi eldegi kókpar federatsiiasynyń prezidenti Jyrǵalbek Samatov. Bul týraly Sputnik Qyrǵyzstan jazdy.
Esterińizge sala keteiik, ótken aptada Astanada búkilálemdik kókpar qaýymdastyǵynyń keńesinde kókpardyń halyqaralyq erejesi bekitilgen bolatyn. Jańa ereje boiynsha endi qazandyqtyń ornyna sheńber paidalanylady. Sondai-aq Halyqaralyq janýarlar álemin qorǵaý uiymdarynyń qaǵidalaryna qaishy kelmeý úshin serkemen emes, mýliajben oinaýǵa sheshim qabyldandy. Alaida aiyrqalpaqty aǵaiyndar ereje Qazaqstannyń yqpalymen bekitilip ketti dep oilaityn sekildi. Qyrǵyzdar sheńbermen oinaýǵa úzildi-kesildi qarsy bolyp otyr.
"Búkil álem kók bórige (kókpar – agenttik eskert.) qyzyǵýshylyq tanytyp otyr. Qóshpendiler oiyndaryn 1,3 milliard adam tamashalap júr, olardyń 90 protsentine kók bóri unady. Bizdiń kórshimiz muny qyzǵanyshtan jasap otyr, olar álemge óz oiyndaryn kórsetýdi qalaidy. Qazaqtar – baýyrlas halyq, biz olardy qoldaimyz, biraq bul jerde olar artyq ketti. Biz taiqazannan bas tartpaimyz", - dedi Samatov.
Jastar isi, dene shynyqtyrý jáne sport jónindegi memlekettik agenttiktiń direktory Qanat Amanqulov qaýipsizdik úshin taiqazannan bas tarttyq degenderi jai ǵana syltaý deidi.
"Biz taiqazandy qaýipsiz etip jasadyq. Jalpy, sporttyń barlyq túrinde táýekel bar. Mysaly, hokkeide oiynshylar búiirge jii soǵylady", — dep málimdedi Amanqulov.
Onyń aitýynsha, Qyrǵyzstanda Ózbekstandaǵy chempionatty ótkizýge arnalǵan taiqazan jasalyp jatyr.
Jyrǵalbek Samatov taiqazannan bas tartý ideiasyn tek 5-10 adam qolpashtap otyrǵanyn, al qalǵandary buǵan múdelli emes ekenin aityp ótti.
Aita ketsek, Qazaqstan quramasy byltyr Dúniejúzilik kóshpendiler oiyndarynda jartylai finalda ózbekterden jeńildi. Osydan keiin ulttyq quramaǵa qyrǵyzdardan qorqyp, ádeii jeńildi degen syn aityldy. Qazaqstannyń kókpar federatsiiasy túsindirgendei, kóshpendiler oiyndaryna tájiribe jinaý úshin jas kókparshylar jiberilgen. Qazaqstan kóshpendiler oiyndarynda jalpy esepte 3-oryn alǵan edi.
