Ál-Farabi atyndaǵy Qazaq ulttyq ýniversiteti álemniń eń úzdik 200 ýniversitetiniń qataryna endi, dep habarlaidy "Ult aqparat".
Ál-Farabi atyndaǵy Qazaq ulttyq ýniversiteti Elbasy N.Á.Nazarbaev tapsyrǵan jáne Qazaqstan Respýblikasynyń bilim jáne ǵylym salasyn damytýdyń memlekettik baǵdarlamasyna engizilgen 2020 jyly álemniń eń úzdik 200 joǵary oqý oryndarynyń qataryna kem degende 2 qazaqstandyq JOO-nyń kirýi mindetin abyroimen oryndap shyqty.
Qazaqstandyq ýniversitet QS jahandyq reitingisinde 165-orynǵa kóterilip, fenomenaldy serpilis jasady. QazUÝ halyqaralyq ǵylym jáne bilim keńistigindegi óziniń álemdik kóshbasshy ýniversitetter qatarynda ekendigin dáleldedi.
Jahandyq eń tanymal jáne bedeldi Quacquarelli Symonds (QS) reitingilik agenttigi álemniń joǵary oqý oryndary boiynsha zertteýdiń biylǵy jylǵy nátijelerin jariialady. QS analitikalyq esebinde atap ótilgendei, ál-Farabi atyndaǵy QazUÝ 42 orynǵa ilgerilep, jahandyq reitingide 165-oryndy ielendi jáne «álemniń eń úzdik 200 ýniversitetteriniń qataryna engen alǵashqy qazaqstandyq joǵary oqý orny boldy». Postkeńestik elderden tek eki ýniversitet qana osy topqa enip otyr – M.V. Lomonosov atyndaǵy Máskeý memlekettik ýniversiteti jáne ál-Farabi atyndaǵy Qazaq ulttyq ýniversiteti.
Álemdik joǵary bilim berý tarihynda buryn-sońdy bolmaǵan qarqyndy damýdy kórsete otyryp, 9 jyl ishinde ýniversitet shamamen 500 orynǵa alǵa jyljydy. Álemdik reitingte qysqa ýaqyt ishindegi bundai biregei ilgerileý «ál-Farabi atyndaǵy QazUÝ fenomeni» dep atalyp sheteldik sarapshylar nazaryn ózine aýdartty. Qazaqstandyq joǵary oqý orny qarqyndy damýynyń jarqyn úlgisi halyqaralyq akademiialyq ortada belsendi túrde talqylanýda. Kóptegen sheteldik joǵary oqý oryndary QazUÝ-dyń oń tájiribesin qoldanysqa engizýde.
Álemdik reitingide jetken biik jetistikte ýniversitet rektory, akademik Ǵalym Mutanovtyń basshylyǵymen QazUÝ-dyń jahandyq básekege qabilettiligin arttyrý boiynsha ýniversitet ujymy atqarǵan qyrýar jumystar tur. Klasterlik turǵydan keshendi qurylymdyq modernizatsiialaý júzege asyrylyp, nátijege baǵyttalǵan basqarý júiesi engizildi. Aldyńǵy qatarly sheteldik ýniversitettermen birlese qos diplom baǵdarlamasy jáne aǵylshyn tilinde bilim berý baǵdarlamalary júzege asyrylýda, sonyń nátijesinde Qazaqstan boiynsha eń kóp sheteldik stýdentter QazUÝ-da bilim alýda. Tek sońǵy jyldyń ózinde olardyń sany 15 esege ósti.
«Maikrosoft» kompaniiasy QazUÝ tsifrlyq modelin eń ozyq tájiribelerdiń biri retinde tanydy. Ýniversitette «ǵylymi ideiadan bastap ony kommertsializatsiialaýǵa deiingi» tehnologiialyq dáliz qurylǵan. Ony tiimdi paidalaný arqasynda ýniversitette 5 jyl ishinde ǵylymi jobalar kólemi 2,5 esege artty. Halyqaralyq reitingi joǵarǵy jýrnaldardaǵy qazaqstandyq avtorlardyń árbir besinshi jariialanymy – QazUÝ ǵalymdarynyń úlesi. Sońǵy 5 jylda ýniversitet infraqurylymnyń jalpy aýmaǵy 50% paiyzǵa deiin ósti.
BUU-nyń turaqty damý jónindegi «Akademiialyq yqpal» baǵdarlamasynyń Jahandyq haby retinde QazUÝ jańa býyn ýniversitetiniń «Ýniversitet 4.0» modelin jasap engizdi. Niý-Iorktegi BUU-nyń shtab-páterinde tanystyrylǵan «Ýniversitet 4.0» modeli halyqarylyq deńgeide keńinen taratýǵa usynyldy. QazUÝ álemniń 12 elinde ál-Farabi ortalyqtaryn ashty.
Qazaq ulttyq ýniversitetiniń álemdik bilim berý keńistiktigindegi kóshbasshylyq deńgeii basqa da halyqaralyq reitingilik agenttikterde kórinis tabýda. QazUÝ álemdegi úzdik 200 ekologiialyq jáne eń ozyq tehnologiialyq ýniversitetterdiń úzdik 50 tobyna kiredi. Eýropalyq ǵylymi-ónerkásiptik palatasy reitinginde QazUÝ «AA+» baǵasyn ielenip, jetekshi eýropalyq joǵary oqý oryndarynyń qataryna endi. Barlyq osy jetistikter arqasynda QazUÝ túrki jáne islam álemindegi eń úzdik ýniversitet retinde tanyldy.
QS reitingisinde Massachýsets tehnologiialyq ýniversiteti kósh bastaidy, ekinshi jáne úshinshi orynda sáikesinshe – Stendford jáne Garvard ýniversitetteri (barlyǵy AQSh-tyń joǵary oqý oryndary). Eń úzdik álemdik joǵary oqý oryndarynyń ondyǵyn tolyǵymen amerikandyq jáne britandyq joǵary oqý oryndary quraidy.
