30 jyl ishinde atqarylǵan jumystar iadrolyq qarýdy taratpaý salasynda Qazaqstannyń álemdik kóshbasshylyǵyn nyǵaita tústi. Bul týraly QR Syrtqy ister ministriniń orynbasary Aqan Rahmetýllin málim etti, dep habarlaidy QazAqparat tilshisi.
«2021 jyl Qazaqstan úshin óte mańyzdy dep sanalady. Sebebi 29 tamyzda biz Semei poligony jabylýynyń 30 jyldyǵyn atap ótemiz. 1991 jyly 29 tamyzda QR Tuńǵysh Prezidenti Nursultan Nazarbaevtyń Jarlyǵymen Semei iadrolyq poligony jabyldy. Iadrolyq qarýsyzdaný men ony taratpaý bizdiń saiasatta basymdyqqa ie boldy. Osy oraida Elbasy iadrolyq qarýsyz álem baǵytyndaǵy jumystarǵa jekelei qatysty. Sonyman qatar, Qazaqstannyń syrtqy saiasaty da halyqaralyq qaýipsizdik pen memleketter arasyndaǵy yntymaqtastyqty nyǵaitýǵa, jahandyq syn-qaterlerdi sheshýge baǵyttalǵan», - dedi Aqan Rahmetýllin Syrtqy ister ministrliginde ótken brifingide.
Onyń aitýynsha, 30 jyl ishinde atqarylǵan jumystar qarýsyzdaný, iadrolyq qarýdy taratpaý salasynda Qazaqstannyń álemdik kóshbasshylyǵyn nyǵaita tústi.
«Prezident Qasym-Jomart Toqaev atap ótkendei, iadrolyq qarýdy taratpaý Qazaqstan saiasatynyń basymdyǵy bolyp qala beredi. Bul óz kezeginde bizge iadrolyq qarýsyz álem úshin kúreste aldyńǵy shepte turý quqyǵyn beredi», - dedi ol.
A. Rahmetýllin ótken ýaqyt iadrolyq qarýsyzdandyrý durys sheshim bolǵanyn dáleldei túskenin atap ótti. Sonymen qatar, ol Semei iadrolyq poligony elimiz úshin orasan zor zardabyn tigizgenin qadap aitty.
