Qazaqstanda jyl saiyn úkimettik emes uiymdarǵa grant taǵaiyndaýǵa arnalǵan baiqaý ótedi. Osy oraida Azamattyq bastamalardy qoldaý ortalyǵynyń basqarma tóraiymy Bátima Mýkina besinshe ret ótken baiqaýdyń qorytyndysyn jariialap, ÚEU-lar tarapynan qandai jobalarǵa qyzyǵýshylyq joǵary ekendigin aityp berdi, dep habarlaidy QazAqparat.
«Aqparat jáne qoǵamdyq damý ministrligi men Azamattyq bastamalardy qoldaý ortalyǵy arasynda grant alýshylarǵa granttyq qarajattardy berý týraly kelisimshart jasalǵan. 15 tamyzda granttyq qarjylandyrýǵa arnalǵan besinshi konkýrs aiaqtaldy. Úsh úkimettik emes uiym beibit jinalystar ótkizýge, reprodýktivti densaýlyq jáne otbasylyq qundylyqtardy nasihattaýǵa qatysty granttardy jeńip aldy. Olar barynsha qyzyqty jobalar. Jalpy, osy jobaǵa 25 ÚEU-den 30 ótinim kelip tústi. Onyń ishinde táýelsiz baǵalaý júrgizý úshin 10 ÚEU-den 13 joba ǵana tehnikalyq erekshelikteri boiynsha óte aldy. Konkýrstyq komissiianyń otyrysy alǵash ret Azamattyq bastamalardy qoldaý ortalyǵynyń Facebook-tegi resmi paraqshasynda onlain formatynda ótti. Niet tanytqan barlyq adam jumys protsesin qadaǵalaialdy. Biz jumysymyzdy barynsha ashyq oryndaýǵa tyrysamyz», - dedi ol.
Sonymen «Jastar arasynda reprodýktivti densaýlyqty saqtaý máseleleri boiynsha konsýltativtik qyzmet kórsetý» jobasyn júzege asyrý Qazaqstannyń jynystyq jáne repordýktivtik densaýlyq qaýymdastyǵyna buiyrdy. Al «Aq bosaǵa» áielderdiń qoǵamdyq birlestigi otbasylyq ózara qarym-qatynasty nyǵaitý boiynsha is-sharalardy júzege asyrýǵa arnalǵan grantty jeńip aldy. «Jas zańgerler palatasy» qoǵamdyq birlestigi «Beibit jinalystardy uiymdastyrý jáne ótkizý boiynsha zańnamany túsindirý seminarlary» jobasyn júzege asyratyn bolady.
«Úkimettik emes uiymdar tarapynan jastar men otbasy saiasatyn qoldaýǵa baǵyttalǵan zobalarǵa qyzyǵýshylyq joǵary. Munan keiin qyzyǵýshylyq týdyrǵan jobalardyń qatarynda Volenter jylya arnalǵan sharalar bar. Aolenterlik uiymdar joǵary qyzǵýshylyq tanytty. Olar elimizde kóp eken. Biyl osy eki negizgi baǵyt ÚEU-lar tarapynan joǵary suranysqa ie bolyp tur», - dedi Bátima Mýkina.
Jalpy, Azamattyq bastamalardy qoldaý ortalyǵynyń málimetterine sáikes, biyl 107 jobany júzege asyrýǵa 1,9 mlrd teńge bólingen. Volenter jyly aiasynda jalpy somasy shamamen 659 mln teńgeni quraityn 26 joba júzege asyrylady. Azamattyq ortalyqty qoldaý jáne damytýǵa arnalǵan 17 jobaǵa 72 mln, óńirlerdegi tutynýshylardyń quqyǵyn qorǵaý salasynda halyqtyń quqyqtyq saýatyn arttyrý baǵytyndaǵy 14 jobaǵa 45 mln, Aýyldyq ÚEU-lardyń áleýetin arttyrý úshin 4 jobaǵa 113 mln, azamattyq qoǵamdy damytýǵa arnalǵan 6 jobaǵa 46 mln, jastar men otbasylyq saiasatty qoldaý 20 jobasyna 622 mln, halyq arasynda kitap oqýdy nasihattaý bir jobasyna 12 mln, qoǵamdyq kelisimmen jalpyulttyq birlikti nyǵaitý baǵytyndaǵy 5 jobaǵa 346 mln teńge bólinip otyr.
