Qazaqstannyń turǵyn úi naryǵyndaǵy ahýal jaqsaryp kele jatyr. Mundai pikirdi Qazaqstan Rieltorlarynyń birikken qaýymdastyǵy prezidentiniń keńesshisi Nina Lýkianenko bildirdi, dep habarlaidy QazAqparat.
«Uzaq ýaqytqa sozylǵan oqshaýlaný rejimi men jyljymaityn múlikpen mámile jasaý múmkindiginiń bolmaýy saldarynan elimizde sáýir aiynda ne bári 5 211 mámile ǵana jasaldy. Bul rekordtyq eń tómengi kórsetkish. Degenmen, qazirgi ýaqytta notarialdy rásimdeýdi, mámilelerdi tirkeýdi qosa alǵanda barlyq saladaǵy qyzmet is júzinde qalpyna keldi desek te bolady jáne mamyrda 17 210 mámile jasaldy. Bul san ai saiynǵy standartty mámilelerge qaraǵanda birshama tómen. Biraq, bul mamyr aiynyń alǵashqy on kúninde barlyǵy úiinde bolýyna bailanysty bolǵan jait», - dedi Nina Lýkianenko.
Onyń atap ótýinshe, resmi statistikalyq málimetterge qaraǵanda, baspananyń bir sharshy metrine baǵanyń azdap qymbattaǵany baiqalady.
«Ósim 1 paiyzdy qurap otyr. Munyń eshqandai ereksheligi joq. Bul investitsiialyq sebepterge bailanysty mámilelerdiń uzaq ýaqyt keiinge shegerilýimen bailanysty. Sonymen qatar, jańa úi salý barysynda qoldanylatyn materialdardyń 24-60 paiyzy importtalatyndyǵyn da qaperge alý qajet. Onyń ústine dollar baǵamy ósti. Al importtalatyn materialdar dollarmen alynatyndyqtan qurylys shyǵyndary da arta túsedi. Bul da baǵaǵa áserin tigizedi», - dedi sarapshy.
Sonymen qatar ol turǵyn úi naryǵyndaǵy jaǵdaidyń ózgeretindigin atap óte kele, baǵanyń kúrt quldyraýy ne ósýi bolmaitynyn basa aitty.
