Búgin QR Úkimetindegi baspasóz konferentsiiasynda Qazaqstan Respýblikasy Premer-Ministriniń orynbasary Jeńis Qasymbek Qazaqstannyń investitsiialyq saiasatyn iske asyrý barysy týraly aitty, dep habarlaidy "Ult aqparat".
Vitse-Premer Memleket basshysynyń Joldaýynda negizgi basymdyqtardyń qatarynda shikizattyq emes sektorǵa sheteldik investitsiialardy tartý mindeti qoiylǵanyn atap ótti.
«Qazaqstannyń táýelsizdigi kezeńinde álemniń 120-dan astam elinen $330 mlrd sheteldik investitsiia tartyldy. Investitsiialardyń negizgi bóligi – 50%-dan astamy – Eýropalyq Odaq elderine tiesili, onyń ishinde: Shveitsariia – 25,8 mlrd, Frantsiia – 16,1 mlrd, Italiia – 8,7 mlrd, Niderlandy – 90,4 mlrd, Belgiia – 7,6 mlrd, Germaniia – 5,2 mlrd. Amerika Qurama Shtattaryna tikelei sheteldik investitsiialardyń 15% nemese 48,4 mlrd keledi. Shamamen 5%– Ulybritaniia men QHR investitsiialarynan turady», — dedi Jeńis Qasymbek.
1 tamyzdaǵy jaǵdai boiynsha Qazaqstanda sheteldik qatysýmen 19 myń zańdy tulǵa jáne bólimsheler jumys isteidi, olardyń ishinde kásiporyndardyń 35,3%-y reseilik, 9,5% – túrik, 5,7% – ózbek, 5,6% – qytai, 3,1% – nemis kapitalynyń qatysýymen.
2010 jyldan beri sheteldik investitsiialar boiynsha qazaqstandyq ókiletti organdar 650-ge jýyq jobalardy qarastyrdy. Onyń ishinde Eýropalyq odaq elderiniń investorlary usynǵan jobalar sany – 185, Resei Federatsiiasy – 111, Túrkiia – 80 jáne QHR – 55 joba jáne t.b. Usynylǵan jobalardan basymdyq zamanaýi tehnologiialardyń transfertin qamtamasyz etetin, qazaqstandyq qamtýy joǵary, QR azamattary úshin barynsha kóp jumys oryndaryn qurýdy qamtamasyz etetin joǵary tehnologiialy jobalarǵa beriledi. Osy kezeńde $16,2 mlrd somasyna 235 joba iske asyryldy (qalǵandary qarastyrylýda), onyń ishinde 133 jobany Eýropalyq Odaq pen RF elderi júzege asyrǵan.
«Álemdegi turaqsyzdyq jáne sanktsiialyq qarsylyq jaǵdailarynda investorlar investitsiialyq ahýaly turaqty elderdi tańdaidy. Árbir el óziniń investitsiialyq reitingin kóterýge tyrysady, sebebi, elge kapital ǵana emes, jańa zamanaýi tehnologiialar da keledi», — dedi QR Premer-Ministriniń orynbasary.
Negizgi investorlardyń biri QHR 15 jobany qarjylandyryp, iske asyrdy, bul 2010 jyldan beri júzege asyrylyp kele jatqan jobalardyń jalpy sanynan 6%-ǵa jýyǵyn quraidy.
Búgingi kúni indýstriialandyrý jáne investitsiialar salasyndaǵy birlesken qazaqstandyq-qytailyq jobalar tizimi jalpy somasy $ 27,6 mlrd quraityn 55 jobany qamtidy.
2015 jyldan qazirge deiin $3,9 mlrd somasyna 15 joba iske qosyldy. Jobalar ekonomikanyń joǵary tehnologiialy salalarynda iske asyrylady: mashina jasaý, himiia ónerkásibi, energetika, balamaly energetika jáne AÓK. 3828 qazaqstandyq jumys orny quryldy.
«Osy jobalardyń barlyǵy elimizdiń ártúrli aimaqtarynda eksportqa baǵdarlanǵan zamanaýi tehnologiialardy qoldanady, qazaqstandyqtarǵa jumys oryndaryn ashady. Munda jumys istep turǵan zaýyttardy kóshirý týraly emes, tehnologiialar transferti týraly aitylyp tur. Indýstriialyq-investitsiialyq yntymaqtastyqtyń Qazaqstan-Qytai baǵdarlamasyn iske asyrý nátijesinde 20 myńǵa jýyq jańa jumys oryndaryn qurýmen birge, sheteldik naryqtarǵa eksporttaýǵa baǵdarlanǵan, qosylǵan quny joǵary otandyq sapaly ónimdi shyǵarýǵa qabiletti birqatar joǵary tehnologiialyq kásiporyndar qurylady dep kútilýde», — dep túiindedi Jeńis Qasymbek.
