Elimizge syrt elderden jetkiziletin júk tasymaly merzimine pandemiianyń áseri týraly «KTZ Express» AQ konteinerlik tasymaldaý qyzmeti departamentiniń direktory Erjan Baiǵojin aityp berdi, dep habarlaidy QazAqparat.
«Pandemiia kezinde syrt elden júk jetkizý ýaqyty orta eseppen 5 kúndi qurady. Al buryn 12 kúnge deiin ýaqyt alatyn. Mysaly, Qytaidyń Chýntsin qalasynan Germaniianyń Dýisbýrg qalasyna taýar 11-12 kúnde jetkiziledi. Jáne júk konteinerleri teńiz arqyly 50 kún ishinde jetkizilse, biz temirjol arqyly 12 kúnde jetkize alamyz. Degenmen, pandemiiaǵa bailanysty jetkiziletin júktiń kólemi artty, sáikesinshe jetkizý merzimi de 17-18 kúnge deiin sozyldy», - dedi Erjan Baiǵojin baspasóz týry barysynda.
Sondai-aq, departament basshysy elimizde konteinermen júk tasymaldaý kóleminiń artqanyn málim etti.
«Qazir elimizde tranzittik-logistikalyq tasymaldaý úderisi artty, óitkeni avtomobil tasymaly jabyq iaǵni halyqaralyq tasymal joqtyń qasy. Sondyqtan da barlyq júk tasymaly temirjol arqyly júzege asyrylady. Qazirgi ýaqytta temirjol júk tasymaly táýlik boiy tynymsyz jumys istep tur. Memlekettik jáne jeke kompaniialardyń kómegimen kez kelgen júkti jetkize alamyz. Búginde júkti konteiner arqyly tasymaldaý joǵary suranysqa ie, sebebi ol óte yńǵaily ári qaýipsiz. Aitar bolsaq, júkti Qytaidan alyp keledi, osyndaǵy logistikalyq terminalda qabyldap, odan ári tapsyrys berýshige jetkizedi. Iaǵni, «esik aldyna deiin jetkizý» qaǵidatymen jumys isteidi. Bul konteinermen júk tasymaldaýdyń tiimdiligin kórsetip otyr», - deidi ol.
