Foto: ashyq derekkóz
Qazaqstan 2026 jyldyń birinshi toqsanyn syrtqy saýda kórsetkishteriniń ósimimen aiaqtady, dep habarlaidy Ult.kz.
Resmi málimetke sáikes, eldiń syrtqy saýda ainalymy 32,9 mlrd AQSh dollaryn qurap, ótken jyldyń sáikes kezeńimen salystyrǵanda 10,5%-ǵa artqan. 2025 jyldyń alǵashqy toqsanynda bul kórsetkish 29,8 mlrd dollar bolǵan.
2026 jylǵy qańtar–naýryz ailarynda eksport kólemi 9,4%-ǵa ósip, 18 mlrd AQSh dollaryna, al import kólemi 11,8%-ǵa artyp, 14,9 mlrd dollarǵa jetti.
Sarapshylar import ósimin ónerkásip, energetika jáne kólik infraqurylymyn jańǵyrtýǵa qajetti tehnika men jabdyqtardy satyp alýdyń kóbeiýimen bailanystyrady. Atap aitqanda, elektr generatorlyq qondyrǵylar importy bes eseden astam ósip, 416,8 mln dollarǵa jetken. Sonymen birge gaz týrbinalary, aviatsiialyq qozǵaltqyshtar, lokomotivter jáne óńdeý jabdyqtarynyń importy artqan.
Esepti kezeńde shikizattyq emes sektordaǵy ósim erekshe baiqaldy. Shikizattyq emes taýarlar boiynsha syrtqy saýda ainalymy 20,4 mlrd dollarǵa jetip, bir jylda 13,5%-ǵa ósken. Al shikizattyq emes eksport kólemi 23,4%-ǵa artyp, 6,9 mlrd dollardy qurady.
Shikizattyq emes eksporttyń negizgi draiverleri retinde mys pen mys katodtary, kúmis, ýran, ferroqorytpalar, mal azyǵy ónimderi jáne kúnbaǵys maiy ataldy.
Sonyń ishinde kúnbaǵys maiynyń eksporty shamamen 60%-ǵa ósip, 277,8 mln dollarǵa jetken. Al ferroqorytpalar eksporty 20,1%-ǵa artqan.
Qazaqstannyń negizgi saýda seriktesi retinde Qytai kósh bastap tur. Birinshi toqsanda eki el arasyndaǵy taýar ainalymy 7,8 mlrd AQSh dollaryn qurap, jalpy syrtqy saýdanyń 23,8%-yn qamtyǵan.
Ekinshi orynda Resei tur. Eki el arasyndaǵy saýda kólemi 6,5 mlrd dollardy quraǵan.
Sonymen qatar Italiia, Túrkiia jáne Ózbekstan Qazaqstannyń iri saýda seriktesteri qatarynda qaldy. Italiiamen aradaǵy taýar ainalymy 3,4 mlrd dollardan asqan.
