2017 jyldyń 23 sáýirinde Qazaqstan Respýblikasynyń Syrtqy ister ministri Qairat Ábdiraxmanovtyń Qatar memleketine bardy, - dep habarlaidy "Ult aqparat".
Qazaqstan syrtqy saiasi vedomstvosynyń basshysyn Doxada sheih Tamim ben Hamad Al-Tani qabyldady.
Suxbat barysynda Qairat Ábdiraxmanov Islam álemi men onyń syrtynda ǵylym men texnologiialar salasyn damytýdaǵy Qatardyń úlesin aita kele, Qazaqstannyń elordasynda 2017 jylǵy 10-11 qyrkúiekte ótetin Islam yntymaqtastyq uiymynyń Ǵylym jáne texnologiialar jónindegi sammitine Prezident Nursultan Nazarbaevtyń shaqyrýyn emirge jetkizdi.
Osy oraida "jasyl ekonomika" texnologiialaryn damytý salasynda Qatardyń jinaǵan oń tájiribesin eskere otyryp, Halyqaralyq mamandandyrylǵan "EKSPO-2017" kórmesine qatarlyq taraptyń qatysýǵa daiyndyǵy jóninde sóz qozǵaldy.
Taraptar qazaqstandyq-qatarlyq qatynastardyń jaǵdaiy men perspektivalaryn talqylap, ekijaqty yntymaqtastyqtyń barlyq baǵyttary boiynsha oń dinamika baiqalýda ekenin atap ótti.
Suxbattasýshylar xalyqaralyq kún tártibiniń ózekti taqyryptaryn, sonyń ishinde Siriiadaǵy jaǵdaidy, Astana protsesiniń damý barysy men onyń qatysýshylar quramyn oǵan arab elderin, atap aitqanda Qatardy tartý arqyly keńeitý múmkindikterin qyzyǵýshylyqpen talqylady. Ministr emirdi Qazaqstannyń BUU Qaýipsizdik Keńesindegi 2017-2018 jyldarǵy músheliginiń negizgi basymdyqtarymen tanystyrdy.
Qazaqstannyń syrtqy saiasi vedomstvosynyń basshysy óziniń qatarlyq áriptesi Muhammed ben Abdrahman Al-Tanimen kelissózder júrgizý barysynda emirdiń Astanaǵa 2014 jylǵy qańtarda sapary jáne Nursultan Nazarbaevtyń 2015 jylǵy qazandaǵy Dohaǵa sapary barysynda qol jetkizilgen kelisimderdiń kópshiligi iske asyrylyp, ekijaqty yntymaqtastyqta eleýli belsendilik baiqalatynyn atap ótti.
Suhbattasýshylar terrorizmge qarsy kúres jáne ekstremistik ideologiialardy taratýǵa qarsy kúreste halyqaralyq kúsh-jigerdi úilestirýdi talqylap, osyǵan orai syndarly órkenietaralyq dialogtyń maǵynasyn atady. Qairat Ábdirahmanov qatarlyq tarapqa Álemdik jáne dástúrli dinder liderleriniń sezin Astanada ótkizýde belsendi qoldaý kórsetkeni úshin alǵysyn bildirdi. Taraptar barlyq, onyń ishinde saýda jáne kóliktik-logistikalyq baǵyttar boiynsha ózara áreketterdi ári qarai arttyrýǵa ekijaqty birdei maqsattaryn bildirdi.
Ekonomikalyq diplomatiia baǵyty boiynsha eki eldiń syrtqy saiasi vedomstvolary qarjy jáne investitsiialyq salalardaǵy bailanystaryn tabysty damytýda, sondai-aq biyl Qazaqstan-Qatar komissiiasynyń joǵary deńgeidegi 5-shi kezekti otyrysy men Astanada 1-shi Qazaqstan-Qatar biznes-forýmyn ótkizýge daiyndyq jumystaryn júrgizýde. Qatardyń Ortalyq banki men Astanadaǵy Halyqaralyq qarjy ortalyǵy arasyndaǵy, onyń ishinde islamdyq qarjylandyrý quraldaryn Qazaqstanǵa endirý boiynsha yntymaqtastyq serpindi damý ústinde. Qatar taraby Qazaqstan ekonomikasynda memlekettik aktivterdi jekeshelendirý baǵdarlamasyna qyzyǵýshylyǵyn bildirdi.
Qatar Memleketi Qazaqstanǵa Astana qalasy qurylysynda, atap aitqanda «Nur Astana» Islam mádeni ortalyǵyn turǵyzý kezeńinde mańyzdy qoldaý kórsetkenin atap ótken jón. Qazirgi ýaqytta Qatar tarabynyń qarjysyna Qazaqstan elordasynyń orta mektebi salynýda, sonymen qatar áleýmettik salada birqatar jobalardy júzege asyrý daiyndyq jumystary iske asyrylýda.
Sonymen birge, Qatar arab elderiniń ishinde alǵashqy bolyp Aziiadaǵy ózara yqpaldastyq jáne senim sharalary jónindegi keńesine jáne Azyq-túlik qaýipsizdigi jónindegi Islam uiymyna endi.
