Qazaqstan Premer-Ministriniń orynbasary – Syrtqy ister ministri Muhtar Tileýberdi Shveitsariiaǵa jumys sapary barysynda BUU-nyń Jeneva bólimshesinde boldy, dep habarlaidy "Ult aqparat" Syrtqy ister ministrliginiń baspasóz qyzmetine silteme jasap.
Onyń BUU Adam quqyqtary jónindegi Joǵarǵy komissarynyń orynbasary Nada Ál-Nashif jáne Adam quqyqtary jónindegi keńestiń qazirgi tóraǵasy - Argentinanyń BUU bólimshesi janyndaǵy Turaqty ókili Federiko Vilegaspen kezdesýleri ótti.
M.Tileýberdi BUU Adam quqyqtary jónindegi Joǵarǵy komissarynyń basqarmasymen (AQJKB) ózara is-qimyl Qazaqstan úshin BUU júiesi uiymdarymen yntymaqtastyqtyń negizgi baǵyttarynyń biri bolyp tabylatynyn atap ótti.
Qazaqstan AQJKB-ny adam quqyqtaryn saqtaý jáne qorǵaý salasynda jahandyq, óńirlik jáne ulttyq deńgeilerde BUU qundylyqtary men maqsattaryn qorǵaý jónindegi qyzmetti júzege asyratyn jetekshi halyqaralyq agenttik retinde qarastyrady.
Osyǵan bailanysty, qazaqstandyq tarap AQJKB-niń adam quqyqtary salasynda júrgizip jatqan qyzmetin joǵary baǵalai jáne qoldai otyryp, óziniń BUU Adam quqyqtary jónindegi keńesine 2022-2024 jyldarǵa músheliginiń basymdyǵyn jáne BUU AQK basqa qatysýshylarymen is-qimyldardy úilestirýdi atap ótti.
Sondai-aq, Ministr Qazaqstandaǵy sońǵy oqiǵalardyń sebepteri men saldary, sondai-aq halyqtyń qaýipsizdigin qamtamasyz etý jáne eldegi qalypty tirshilik áreketin qalpyna keltirý boiynsha memleket qabyldap jatqan sharalar týraly habardar etti. Qazaqstan biligi muqiiat jáne tolyqqandy tergeý júrgizip, onyń nátijeleri álemdik qoǵamdastyqqa usynylatyndyǵy atap ótildi.
Kelissózder barysynda Qazaqstannyń adam quqyqtary men zań ústemdigi salasyndaǵy óziniń halyqaralyq mindettemeleri men ámbebap qaǵidattaryn ustanatyny erekshe atap ótildi.
Qazaqstan Prezidentiniń nusqaýlaryna sáikes, el odan ári saiasi jańǵyrtý, ekonomikanyń ashyqtyǵy men sybailas jemqorlyqqa qarsy kúres baǵytynan ainymaidy. Jańa Qazaqstannyń kún tártibi qazaqstandyqtardyń qaýipsiz ári sapaly ómir súrý jaǵdailaryn qamtamasyz etýge baǵyttalǵan.
Kezdesý qorytyndysy boiynsha taraptar turaqty bailanys ornatýǵa kelisti.
