Prezident Qasym-Jomart Toqaevtyń tapsyrmasyna sáikes, Qyrǵyzstanǵa jalpy salmaǵy 10 000 tonna qazaqstandyq un túrindegi gýmanitarlyq kómek jetkizile bastaǵan edi. Qazaqstannyń Syrtqy ister ministrligi gýmanitarlyq kómektiń qalai jetkizilip jatqany týraly tolyq aqparat berdi, dep habarlaidy "Ult aqparat".
18 mamyrda onyń salmaǵy 4 500 tonna quraityn alǵashqy partiiasy 75 temir jol vagonymen tasymaldandy. Onyń 30-y Bishkekke jetkizilse, qalǵandary eldiń basqa óńirlerine jiberildi.
«Qazirgi kezde ministrler kabineti densaýlyq saqtaý ministrligimen birlesip undy halyqqa, onyń ishinde ásirese áleýmettik jaǵynan nashar qamtylǵan adamdarǵa taratý máselesin pysyqtap jatyr. Meniń oiymsha, qazirgi jaǵdaida Qazaqstan Respýblikasynyń tarapynan úlken kómek bolyp otyr», - dedi Qyrǵyzstannyń Aýyl, orman jáne sý sharýashylyǵy ministriniń orynbasary Azamat Mýkashev.
Qyrǵyz tarapynyń aqparatyna qaraǵanda, gýmanitarlyq kómektiń birinshi partiiasy Memlekettik materialdyq rezerv mekemesiniń Qyrǵyzstannyń Qara-Balta, Balyqshy qalalaryna, iaǵni soltústigindegi qoimalaryna bólindi. Unnyń qalǵan bóligi eldiń ońtústigindegi Osh pen Djalal-Abadqa tasymaldanady.
«Gýmanitarlyq kómek ataýly túrde jetkizilip otyr, sondyqtan atalǵan un bul oblys ortalyqtarynda, osy ónimge zárý túpki alýshylar arasynda taratylmaq. Áleýmettik jaǵynan nazar qamtylǵan adamdarǵa tegin beriledi», – dep atap ótti A. Mýkashev.
Osy oraida qyrǵyz tarapy Qazaqstan Úkimetine jáne tiisti memlekettik organdaryna gýmanitarlyq kómekti jedel jetkizgeni úshin airyqsha alǵysyn bildirdi. Eske salsaq, ony bólý máselesi Qazaqstan Prezidenti Q. Toqaev pen Qyrǵyzstan Prezidenti S. Djaparovtyń 2021 jyldyń 1 mamyrynda bolǵan telefondyq suhbatynda qarastyrylǵan bolatyn.
Qazaqstannyń Qyrǵyzstandaǵy Elshisi Rápil Joshybaev Qazaqstannan ótken jyly indet bastalǵan kezde-aq gýmanitarlyq kómek sheńberinde 5 000 tonna otandyq un ónimi Qyrǵyzstanǵa jiberilgenin atap ótti. «2020 jyly kúzde Úkimettiń sheshimimen elimizde jasalǵan 400 dana portativti jeldetý apparaty, 2 million betperde jiberildi. Buǵan qyrǵyz halqy rizashylyǵyn bildirip jatyr. Biz qiyn kezde árqashan kómektesemiz degen oidamyn».
Gýmanitarlyq júktiń qalǵan bóligi mamyrdyń aiaǵyna deiin jetkiziledi dep kútilýde.
Oǵan qosa, ónimdiligi joǵary kúzdik bidaidyń 1 myń tonnasyn jetkizý máselesi sheshilýde. Bul kómek tek halyqtyń nashar qamtylǵan bóligine ǵana emes, Qyrǵyzstannyń fermerlerine de berilip, olar óz egistik alqaptaryna sapaly tuqym egetin bolady.
