Qazaqstannyń Reseidegi Elshisi Ermek Kósherbaev Kalýga oblysyna jumys saparymen baryp, onyń barysynda oblys basshylyǵymen jáne óńirdiń iri kásiporyndarymen birqatar kezdesýler ótkizdi.
Bul týraly QR Syrtqy ister ministrliginiń baspasóz qyzmeti habarlady.
«Vorsino» júk qalashyǵynyń mýltimodaldyq kólik-logistikalyq ortalyǵynyń «Zapad» konteinerlik terminalynyń ashylý saltanatynda Elshi Kalýga turǵyndaryn tek oblys pen Resei úshin ǵana emes, Eýraziialyq ekonomikalyq odaq elderi úshin de mańyzdy oqiǵamen quttyqtady. Ol óńirdiń kólik-logistikalyq infraqurylymyn damytýdaǵy tájiribesin Qazaqstan úshin qyzyqty dep atady jáne kólik-logistikalyq ortalyǵy qazaqstandyq kásiporyndarmen jáne kólik toraptarymen yntymaqtastyq ornatatynyna úmit bildirdi.
Kósherbaev Qazaqstan men Reseidiń tranzittik múmkindikteri arqyly Eýropa men Ońtústik-Shyǵys Aziiany bailanystyratyn «Batys Eýropa – Batys Qytai» transqurlyqtyq kólik dáliziniń bóligi retinde Kalýga oblysynyń logistikalyq áleýetin keńeitýdiń erekshe mańyzdylyǵyn atap ótti.
Is-shara aiasynda otandyq diplomat «Resei poshtasynyń» Bas direktory Maksim Akimovpen, sondai-aq jańa konteinerlik terminal qurýdyń bastamashylary men investorlarymen, «Delo» kompaniialar tobynyń prezidenti Sergei Shishkarevpen, «Freit Villadj Kalýga Sever» JShQ direktorlar keńesiniń tóraǵasy Petr Baskakovpen jáne «TransKonteiner» kompaniiasynyń prezidenti Aleksandr Isýrinmen kezdesti.
Kalýga oblysynyń gýbernatory Vladislav Shapshamen ekijaqty kezdesý aiasynda taraptar saýda-ekonomikalyq yntymaqtastyqtyń oń serpinin atap ótti. Qazaqstan 2020 jyldyń qorytyndysy boiynsha eksport kóleminen birinshi oryn alyp, Kalýga oblysynyń negizgi syrtqy saýda seriktesteriniń biri bolyp qala beredi. Sońǵy tórt jylda saýda 80%-ke ósti jáne 180 million dollardan asty, al pandemiianyń daǵdarys kezeńinde de saýda kólemi azaiǵan joq.
Qazaqstan Elshisi millionnan astam adamnan turatyn halqy bar aimaq eldi kóptegen ónim túrlerimen qamtamasyz etetinin basa aityp, Kalýga oblysynyń óndiristik áleýetin joǵary baǵalady. Ol jergilikti biliktiń investitsiialyq saiasaty joǵary halyqaralyq standarttarǵa sáikes keletindigin jáne basqa elder úshin úlgi bola alatyndyǵyn atap ótti.
Taraptar ózara is-qimyldyń barlyq salasy boiynsha kóptegen máselelerdi talqylady.
Ekijaqty bailanystardyń áleýetin odan ary arttyrý úshin jaqsy múmkindikter bar ekeni atap ótildi.
Kezdesýge qatysýshylar investorlyq qyzmet pen óndiristik kooperatsiiany qosa alǵanda, eń mańyzdy baǵyttar boiynsha yntymaqtastyqty dáiekti túrde damytýǵa kelisti.
Sapar barysynda E. Kósherbaev «Vorsino» indýstriialyq parkindegi «LAMINAMAM» jáne «Arhbým tissiý grýpp» kompaniialarynyń zaýyttarynda, «Krivskoe» AQ agroónerkásiptik kásipornynda jáne «ETNOMIR» park-mýzeiinde boldy.
